Кхелахой шербаь гуллам

Укха деношка Магасе дIабехьар ГIалгIай Республика кхелахой шербаь гуллам. Цига дакъа лоацаш хиллар ГIалгIайчен Мехкда Евкурнаькъан Юнус-Бек, кхыбола хьакимаш. Гулбеннараш дийцар дIадахача 2018 шера шоаш баь болхи, доладеннача 2019 шера де лерхаш дола гIулакхаши.

Шоаш баьча белха мах оттабеш ГIалгIай Мехка Лакъерча Кхела кулгалхо волча Фаьрганаькхан Ибрахьама къамаьл деш белгалдир 2018 шера шой йиллача хана а лакхерча боарамца чакхдаьккхача 40 000 совгIа гIулакхах. «ДукъагI мел дола кхела гIулакхаш – 95% шой ханна дийца чакхдаьккхад. 20I8 шера юкхерча юрисдикцен кхелаш хьалхарча инстанце дийца чакхдаьккхад 30 000 совгIа гуIлакх»,- аьлар Фаьрганаькъан И.
ДIахо цо дийцачох, дIадахача шера вай Лакхерча Кхеле апелляцена лаьрха 300 гаррга гIулакх кхаьчадар. 2017 шерага хьажача уж дукха башхало йолаш дар. Эггара дукхагIа гIулакхаш кхаьчадар Магасерча районни кхелагара -155. ДIахойода Назранера кхел (32), кхоалагIа моттиг йийкъар МагIалбикерий Шолжарий районни кхелаш (хьаранена — 33 гIулакх). Илдарха-гIалера хьакхаьчадар 30 гIулакх.
Иштта дIахо даьча къамаьлаца Лакхерча кхела кулгалхочо белгалдаьккхар кхыча оагIорахьа шоаш баь болх. Царна юкъе бар наха лоIам болча кхелашка цар дешаш дувцаргдола гIулакхаш а.
Мехкдас, ше къамаьл деш, баркал аьлар гулбеннарашта цар баьча балхаха лаьца.
Цо яхачох, кертте латта дезар да сага бокъои паргIатои лораделга. «Эггара чIоагIагI оаш теркам бе безар тахан кхелах наьха тешам лакхбелга да. Оаш беш бола болх кхыа лакхбе без, наха гуш, къейле йоацаш хила без. Кхелий тоабано беш бола болх наха ховш хила без, кхелахой бахача наьха бокъоний культура эййеш хила без», — аьлар Евкурнаькъан Ю.
Къамаьл чакх долаш Мехкдас даькъала вир Фаьрганаькъан Ибрахьам «Заслуженный юрист Российской Федерации» яха сийлен цIи ялара. Иштта баркал аьлар цо судахоштеи, цар болх Iалаш беш мел болча наха а.

№ 25 (12160), ера, 21 февраль, 2019 шу / четверг, 21 февраля 2019 года

Добавить комментарий

Ваш e-mail не будет опубликован. Обязательные поля помечены *