Сакъердаме дувцараш

НАЬНА ХЬЕХАМ

— ЙоIа цу лаха, воIа фу лаха, яьхад вай даьша. ВIалла а хье йоала а йоалаш хьай дегIа хало ма елахь,— аьнна хьехар даьд маьре йодача ший йиIийга нана.
Цо ма аллара, вIалла а маьрцIаьй коа-карта хIама дара тIерахиннаяц йоI. Цо де мел дезаш дар ше кхоачашдеш хиннад маро.
Юххера из кIорда а даь, йитай цо из. ЦIайодача новкъа ший наьнах кхийттай.
— Фу леладу Iа, са йоI? Диканна яьннайий-хьогI хьо новкъа? — хаьттад нанас.
— la даь хьехар да хьона ер сох дахар,— яьхад йоIо.— Данне а аз коа-карта хIама де ца тигача: «ГIо хьай нана йолча»,— аьлар сога маро.

ДОТТАГIА ЛАРХIАР

Ши доттагIа хиннав Iаббаси ЯрагIии. Дош алара геттара тIера болаш, вIаши аьнначох цIаккха а эгIаз ца болхаш, доагIача а ца доагIача а шоай бег тохаш. лийнаб уж.
Цкъа цхьан фусаме нийсбеннаб уж. ХIаьта дахар-денар дувцаш багIаш Iаббас араваьлча, цох лаьца аьннад ЯрагIес:
— ДIадаккхал дIа, доккха жIали дар из-м! Иштта ЯрагIи воацача хана, Iаббаса а аьннад:
— Ше ма ярра говр яр из-м, кхы хьаькъал доацаш! Цхьа ха яьннача гIолла пхьор оттадаьд царна: цхьаннена хьалхашка оттаяьй, вIалла гонахьа дулх а доацаш, жIалена мара йохкаргйоаца тIехкаш, хIаьта вокхунна хьалхашка говра буллаш бола кен биллаб.
Цигара ара а баьнна болхаш, шоашта даьча хьоашалах цецваьннача Iаббаса хаьттад:
— Даьллахьий, ЯрагIи, фу дар-хьогI цу цIендас вайна цу тайпара хьоашал дар? Кхы со хьоаваь хIама-м аьннадацар Iа цунга?
— ХIама аьннадацар, хьох жIали дар из-м аларал совгIа. Iа фу аьннадар? — хаьттад ЯрагIес.
Долчча тайпара Iаббаса а дIадийцад ше аьннар. Цу хана денз чIоагIо яьй йоах новкъосташа бахача а баьхкача а шоайла во дош ца ала.

Гулдаьр Малсагнаькъан Або

№ 25 (12160), ера, 21 февраль, 2019 шу / четверг, 21 февраля 2019 года

Добавить комментарий

Ваш e-mail не будет опубликован. Обязательные поля помечены *