Кхоллама наькъаш

Дукха ха йоацаш Янднаькъан Джамалдина цIерах йолча библиотеке дездир «Вай way» яха кагирхой журнал арадалар. Кагирхошта из совгIат даьр я Цхьорой Аза. «Къона йоазонхой, поэташ, суртанчаш, Iилманхой — дукха говзанчаш вIашагIтоха уйла йолаш, цар начIал наха довзийта чам болаш, болабир аз сай кхоллама никъ» — ше малагIа уйла йолаш тIаийцар журналацара гIулакх дувц кертерча редактора.

Библиотеке дукха нах гулбелар цу дийнахьа: хьаьшашта юкъе бар журналисташ Хачубарнаькъан Адам, ГIазгиренаькъан Альбика, Цхьорой ИбрахIим, суртанча Мартазанаькъан Мувса, йоазонхо Дзугайнаькъан Билал, низъоамалхо Янднаькъан ИсмаIил, «ТОМА РИ» яхача къонача йоазонхой цхьанкхетаре чувоагIаш вола Горчханнаькъан Анзор, ишта кхыбараш а.
«Журнал» яха хоамкаьхат довзар, эггара хьалхара газета арадалар, цар кеп — цу тайпара хаттараш доашхаш, хоам бир библиотека болхлочо Гадаборшнаькъан Хьавас. Тайп-тайпарча моттигашкара кагирхоша, журнал арадаьнналга хеза, даьхача ловцашка ладувгIа таро хилар цу вIашагIкхетаре. Видео гойтам кийчабаьбар кагирхоша.
Журнала цIи йоашхаш атта я: Вай way — вай никъ яхилга да. Цхьорой Азас даьржа жоп делар журналах а, ший кхолламах а долча хаттарашта.
Аза дукха дийша саг я. Цун дешар дайнадац. Эггара хьалха цо яьккхар культуры и искусств яха Краснодарера университет, цу юкъа цо карадерзадир юристал, социально-экономически институте деша этта.
Дукха болх баьб цо суде, цул тIехьа библиотеке балха эттай, ший кхолламцара чам совбалар бахьан долаш. ХIаьта тахан журналаца къахьегаш я, лакха говзал йола кагирхой тIахьехаш.
Хьалхара журнал «Вай way» арадаьлар «Машук» яхача форуме дакъа лаца а, цига котало яккха а аьттув баларца.
Оаха чIоагIа сатувс шоллагIча таьрахье дола журнал арадаларга. Цу тайпара болабаь никъ юхасоцабе йиш яц!
Дала аьттув боаккхалба Азай ше доладаьр хIанз санна эзди дIадахьа!

Новрузнаькъан Макка

№ 33 (12168), шинара, 5 март, 2019 шу / вторник, 5 марта 2019 года

Добавить комментарий

Ваш e-mail не будет опубликован. Обязательные поля помечены *