Эггар тIехчарех футбола стадион хургья ГIалгIай Мехка

Магасе хила езача футбола стадионах бола халкъа хоржам чакхбаьннаб, шийна тIехьа тIехболчарех йола стадион хьалхаяларца. Цох бола хоам бир Мехкдаьца хиннача вIашагIкхетаре ГIалгIайчен гIишлон министра заместитель йолча Пхьилекъонгий Лидас. Цо яхачох, мехка бахархоша хоржаргболаш кхаь тайпара стадиона гойтам оттабаьбар, карарча хана инновационни технологех болча кхоачамца Iалашбаь. Хоржамаш деча юкъа овттаяь хиннача кхаьннех шоллагIча проекта дукхагIа кхач тессаб мехка бахархоша – 63,23%.

Стадиона проекташта кхаж тоссаш хоржамаш дIадихьад цхьан бетта йолча хана чухьа, гIишлон министерстваи, Магаса администрацени сайташ тIа гIолла. Лидас яхачох, наха харжарца хьалхаяьнна проект, геттара дика а, шийгахьа дукха кхоачамаш долаш а, тIехйолчарех я. Маьлха зIанарашта тара а болаш, гIаьний хьисапе ба белгаляьннача проекта оттам.
ГIалгIайчен Мехкдас Баматгире Юнус-Бека белгалдаьчох, кастлуш проекташ увттаярах йола Москвера АО «ЦНИИЭП Жилища» яхача юкъарчено апрель бетта чакхбаккха а лерхIаш, цу тIехьа эшаш бола болх дIаболабергболаш ба. ХIаьта стадиона гIишлон балхаш укх шера дIадоладе лерхI. ГIишлон министерствона тIадиллар Мехкдас проекта чу доагIаш мел дола балхаш кхоачаш, тIехдика чакхдоахаргдолаш тIахьожам бе, аьнна.
«Къаьстта теркам беш хилалаш къаман проектах деш долча балхашта. Нагахьа санна мехка бахархоша из проект белгальяь яле, цу тIа совцаргда вай. Из хоржам, болчарех толашагIа ба. Ший тайпара йолча Магас шахьара архитектураца товш хургья из стадион», — аьнна белгалдир Баматгире Юнус-Бека.
Из стадион хьаеш дIагIоргдола ахча да 5 миллиард сом. Цкъа цхьан юкъа 15 эзар хьежархой чуэца йиш йолаш хургья стадион. Футбола гIишлол совгIа цу юхе кхы а низъоамала даькъе кхоачамаш Iалашдергдолаш да.
Дагадоха деза, дIадахача шера июль бетта паччахьаца Владимир Путинца Мехкдаь хиннача вIашагIкхетаре Баматгире Юнус-Бека Путингара мехка стадион ерах йола проект кхоачашъеш гIодар дийха хилар. Цу хана Мехкдас белгалдаьккхадар, ший къаьстта стадион йоацаш ГIалгIайче мара кхы цхьаккха а мохк бац Россе, аьнна. Цига хиннача вIашагIкхетаре Мехкдаь дехар кхоачашдергда аьнна жоп деннадар паччахьас Путин Владимира.
ТIехьарча шерашка низъоамала даькъе дукха гIишлош хьалъяьй вай мехка, низъоамалхошта цу оагIорахьа дика гIо а да деш, цудухьа шоаш дIанийсбеннача хьалхара моттиг Iалашъярца уж белгал а бийнаб. Иштта хургда футболацара гIулакх а, Дала аьннадале.

Матенаькъан Илез

№ 33 (12168), шинара, 5 март, 2019 шу / вторник, 5 марта 2019 года

Добавить комментарий

Ваш e-mail не будет опубликован. Обязательные поля помечены *