2019 шера ах бIаь совгIа юкъара гIишлош болх бе йолалургья ГIалгIай Мехка

2019 шера ГIалгIайчен доазон тIа 61 юкъара гIишло хьаелларгйолаш а дIахо кхы а хьалъе йолаергйолаш я. Из болх чакхбоале 2 эзар совггIа балха моттиг Iалашъергья гIалгIашта. Цох бола хоам бир гIишлон министра Вешкарнаькъан Османа Мехкдаьца Евкурнаькъан Баматгире Юнус-Бекаца хиннача вIашагIкхетаре.

«Укх шера болх чакх а баьнна кийча йолаш 51 юкъара лерхIам бола гIишло йистеяргья вай. Царех 24 берий бешамаш я, 8 школа я, 6 культура цIенош да, 8 инженерни сетеш я, 3 унахцIенон гIишло я, цхьа вахара цIа да, иштта кхы а цхьа низъоамала гIишло я. Уж массаяр болх бе йолаеларца 2150 балха моттиг Iалашъе лерхI вай», — аьнна белгалдир Османа.
ДIахо министра дийцар юхе йиса 10 гIишло 2020 шерага яргья, аьнна. Царех 8 школа я, цхьа унахцIенон гIишло я, иштта цхьа санаторно-курортни лерхIама гIишло а я. Вешкарнаькъан Османа дIахо дийцар, керда юкъара гIишлош дукха хIама ца эшаш мехка массайолча юрташка хургйолаш я, аьнна.
«220 моттиг йола берий бешамаш хургья 22 нах бахача моттигашка, уж шахьараш а юрташ а я. ХIаьта школаш хьаелла лерхI мехка йиъ шахьареи, кхаь юртеи. Иштта МагIалбике хьалдергда психоневрологический дом-интернати дукхаквартираш йола вахара цIаи. ХIаьта Эбарг-юрта амбулатории, Сунже поликлиникаи хьаелларгья. 6 юрташка культура цIенош хьаделларгда, цхьа физкультурно-оздоровительни гIишло хьаелларгья шийца бассейн а болаш», — аьнна дийцар гIишлон министра.
Хьадувцачох 6 юрта хий дулларгдолаш а да, хIаьта ДаьттагIаи, Аки-Юртеи насосни станцеш ергья. Иштта Тирка аргIаца бурув а теха артезиански скважина оттаергйолаш я.

Матенаькъан Илез

№ 34-35 (12169-170), ера, 7 март, 2019 шу / Четверг, 7 марта 2019 года

Добавить комментарий

Ваш e-mail не будет опубликован. Обязательные поля помечены *