ГIалгIайчен лоаме туризма даькъе шерлуш йоагIа

ЖIайраха района доазон тIа хьалъеш латтача хьаьший тIаийбара шин гIишлон болх дIа мишта бода хьажа, балха гIулакха ваха хилар ГIалгIайчен Мехкда Евкурнаькъан Баматгире Юнус-Бек. 2018 шера Соче дIайихьача Россе инвестиционни форуме язбаь хиннача бартаца уж проекташ чакхйоахаш ва цIихеза предприниматель Куштнаькъан Башир.

Юххьанца водаше Iарамхе хьалдергдолча «Кушт-Плаза» яхача хьаьший тIаийбара цIа хургдолча моттигага хьожаш чакхваьлар Мехкда. Цул тIехьагIа Духьаргаш тIа «Кушт-ГIала» йолча дIатIабодача наькъа тоабара хьал тохкаш а цигара болх мишта дIабода а хьожаш хилар из.
Из туристически юкъарал мехка бюджета юкъе доагIаш доацача ахчанца хьалъяь я. Цу чу йоагIа хьаьший тIаийбара-ресторани, прогулочно-паркови моттиги, Iамаши, иштта аттракционаши, говраш лелаю кхийи. Карарча хана йоаккхаш проект я, цу юкъаралгара Маьт-Лоам тIа хьалтIабаккха уйла йолаш болча 3,6 км дIоахал долча гIандаш Iодадача муша наькъах. Из моттиг 2,5 км гаьна я ТIаргим-Iарамхий яхача мехка лоархIам болча наькъа.
Март бетта хьалхарча дийнахьа Ростуризма кулгалхочунца Догузова Заринайца Баматгире Юнус-Бека хиннача вIашагIкхетаре барт бе аьттув баьннабар «Кушт-ГIала» а иштта цунна дIатIабодаш бола никъ а тоабергболаш болча балха кхоачам 2013-2020 шерашка йолча «Развитие культуры и туризма» яхача программа юкъе бахийта.
Ший балха гIулакх чакхдоаллаш Куштнаькъан Башира нана яь ди дездеш цунца вагIа ваха хилар Мехкда. Йоккхача сага ловца а баьккха, мехка а шоай халкъа а накъа бовлаш эзди дезал цо кхебар бахьан долаш баркал аьлар Баматгире Юнус-Бека.
ГIалгIайче дегIайоалаергахьа йолча экономика керттера а хьалхарчарех а я туристически оагIо. Федеральни юкъарло гIо дирца мехка массехк проект чакхъяьккхай туризм дегIайоалаеш. ДIахо а керда маршруташ хьаелларца эша кхоачам Iалаш беш ба. Мехка тIаухаш бола арахьара нах тIехьарча 5 шера шийттазза дукхагIа ба хьалха хинначул. 10,8 эзар саг вар 2013 шера, х1аьта 132,5 эзар – 2018 шера.
Цу оагIорахьа къахьегадезача ГIалгIайчен керттерча къахьегамах цаI ба «Армхи» курорт шеръяр. АО «Курорты Северного Кавказа» яхача юкъарчен комиссе 2018 шера инвентаризаци йир цун кхоачам Iалашбара. ХIаьта чаккхе еш, соцам баьбар 2019 шера денз цу курорта ахча дIатIадахийта а из шеръе а. Эггара хьалхарча аргIанца 2019-2021 шерашка хехкабала моттиг алсамъяккха лерхI 2,5 км дIоахалга кхаччалца. ШоллагIа аргIа 2020-2022 шерашка, кхы а 4,8 км дIоахал долаш хехкавала моттиг Iалашъе лерхI. Иштта гIандаш дада муша никъ а дегIабоалабе лерхI 1,4 км дIоахал долаш. Цун лакхален борам 1830 метр хургба.
ХIанз латтача хана ма тов аьттув ба мехка туризм дегIайоале а, цунгахьа дола эшамаш юстара даха а. Керттерадар да, дог ца а эккхаш, тIахьайзза боагIача боараме болх кхоачашбар.
Матенаькъан Илез

№ 36 (12171), шинара, 12 март, 2019 шу / Вторник, 12 марта 2019 года

Добавить комментарий

Ваш e-mail не будет опубликован. Обязательные поля помечены *