Сакъердаме дувцараш

ДОАКЪАЗАЛ

Ги елла гиба а йолаш, базар тIа даьтта дохка водаш хиннав цхьа лоамаро. Ше-шийца уйла еш, дагадехад цунна:
— Юкъах тепчеи, шалтеи, тури уллаш, кадайча дын тIа а вагIаш, укх новкъа воагIаш со а валар. ПхорагIа никъ хоадабе дагахьа бедда боагIаш берста сай а балар. Топ теха из бе а бийна, тула а баь, цох диъ дакъа а даь со воаллача хана, ворда тIа а багIаш духьалбоагIаш сона йийха ягIа йоIи, уст-нанеи, уст-йишеи а балар. Цхьа дакъа уст-нанна лургдар аз, шоллагIа дакъа уст-йишийна лургдар аз. ХIаьта юхедиса ер ши дакъа хьона лу аз, аьнна, со шийга йистхилча: «Даьра, дезац сона-м!» — аьнна, дIаерзаргьяр сона йийха ягIар.
Цу уйлаша догдикадаь, ший нускал диста дагахьа лоамаро сеттача, «гIaп», аьнна, кхерах дIакхийтта, цунна ги яьлла гиба ехай, даьтта Iодахад. Цох догдаьттIа лоамаро, кхы де хIама а доацаш, шорттига цIавийрзав.

«ПХЬА ХЬАРЧАР»

МоцагIа-моцагIа, ги елла топ а йолаш, хаьн уллаш тури шалтеи долаш, кIаьдвенна, хьоцар а даьнна, ший коа юккъе дахча доаккхаш воаллаш хиннав цхьа лоамаро. Цо дахчах диг массаза тох, ги йоалла топ фоартах кхеташ хиннай. Из сурт зийна, юхегIолла тIехвоалаш волча цхьан сага аьннад:
— Яй, къонах, фу леладу Iа? Из ги йоалла топ Iо а яьккха, хаьн улла тури, тепчеи, шалтеи Iо а дилла даккха мегаций Iа из дахча?
— Даьра, новкъост, — яьхад лоамарочо, — боккха бала ба хьона аз хIанз токхар. Пхьа ма хьаьрчабий сох! Ши шу а да са сесаг едда маьре яха, хIаьта со дийна а волаш цхьаккха а молла кхычунца цун мах бе тугаш вац!

НОВКЪОСТА ПИТАМ

Гаьнна цхьаннахьа ваха аьнна араваьнна хиннав ши новкъост. ХIаьта наькъа бIоахалла лаьрхIача, яа-мала ийца хIама кIезига хиннай цар. Дикка шоаш гаьна баьннача хана, мец а бенна, хьог а бенна, хIама даа Iохайшаб уж.
Даьллахь, хьанехк, из хьа да мишта велар мича хов сона-м — аьннад цхьанне.
Ший да дага а веха, вож из вувца волавеннав, хIаьта хаттар даьр чуийнна хIама даа эттав.
— ХIанз Iа дувцал хьай да валар, — дийхад шоллагIчо, ше Iехаваьлга гуча а даьнна.
— Даьллахь, кхы еш йоккха хало йоацаш, цкъа-шозза «axI» а аьнна, венна дIаваьлар из-м! — яьхад вокхо, даар юкъах а ца дуташ.

ХЬАЛХАГIА IОМАДАЬДАЛАРЕ

— Сона хозаш хьо кхы Iaxe, ер шалта теха, из корта дIа хьа бахийта, — аьннад жIалега ший сесаг шиш болаш Iомае дагадеха, кхыча наха а иштта из деш хиннад аьнна хезача цхьан маро.
ХIаьта жIали кастта юха а Iаьхад. ТIаккха сесага хьалхашка ший дош кхоачашде дагахьа, сиха бетта чура шалта а яьккха, жIалена тIатоссавеннав мар. Кертах тоха аьнна лостаяь шалта, жIале цIогах кхийттай.
— ХIанз тIехьа да из: дIадийнар мара тIадаьнна моттиг яц, — яьхад сесага. — Ховргдар хьона, Iа хьалхагIа Iомадаьдаларе, хIанз Iа цхьа дош аьлча а тоъаргдар!

Гулдаьр Малсагнаькъан Абу

№ 37-38 (12172-173), ера, 14 март, 2019 шу / Четверг, 14 марта 2019 года

Добавить комментарий

Ваш e-mail не будет опубликован. Обязательные поля помечены *