Сурхо тIа 540 дешара моттиг Iалашъяь школа хьаелларгйолаш я

ДIадахача шера гурахьа яздаьдар оаха Сурхо тIара номер 2 йола школа йохаяь, IолеIа дIа а яьккха, цига йоккхагIа а, тIеххьарча технологен кхоачамца Iалашъяь а керда школа хьалйола а яь даггара къахьегаш дIабодаш болх ба, аьнна. Цу хана болх дIахьош хинначар хьайийца ха геттара кIезига а, цу хана чухьа болх чакхбаккха цар вIаштIехьадаргдий-хьогI аьнна а хеташ яр. Бакъда, болх дIаболабаь дукха ха еце а школа укх шера март бетта хьаелла лерхI, бераш хьалха шоаш ихача тайпара цу школе деша а ухаргдолаш. Из доацаш, кхыйола цу юртара цхьаькха дешара гIишло а тоаергйолаш я. Болх мишта дIабода хьажа а, кердача гIишлонах бIаргтоха а ше ваха хилар ГIалгIайчен Мехкда Евкурнаькъан Баматгире Юнус-Бек.

Ала деза, Сурхо тIа керда школа хьалъярга юрта бахархой хьежа дукха ха яр, аьнна. ХIана аьлча ткъо эзар гаргга нах бахача юрта йиъ школа яле а кхоачам болаш яцар уж цхьан сменах дешаргдолча тайпара школашкара болх Iалашбе. Деррига бераш дIачу ца хувша школа цаI мара яцар юрта, хIаьта хIанз из а тIехдика болх беш 540 бера деша моттиг йолаш къахьегаш хургья, дIахо йодача хана.
«Сурхо тIара хьалхара школа хьалъяьяр 1962 шера, цу чу Iалашяь 375 дешара моттиг яр. ХIаьта доладаь балхаш чакхдахарца бераш чуэца из кийча хургья, укх шерара керда дешара шу долалуча хана. Юрта дукха нах бахаш хилар бахьан долаш къаьнарча школе дешара моттигаш таац, бакъда керда школа хьалъяь йолаш из чоалхане хаттар юстарадаккха цо гIо дергда тхона», — аьнна белгалдир хьехархоша.
Мехка гIишлон министра Вешкарнаькъан Османа Мехкдаьга хоам бир, карарча хана дукхагIа мел дола балхаш даь чакх а даьнна, школа гонахьара доазонца лостам беш а, цига цхьалхо еш а къахьегаш ба болхлой, аьнна.
«Оаха лерхI деррига балхаш март бутт чакхбоаллаш йистедаха. Школа хьалъеш я федеральни таронца, цунга дIадахача ахчан боарам 435,6 млн сом ба. Юрта шоллагIйола школа я ер, хIаьта иштта кхоачамбоацараш юстардахар духьа тоаяргахьа хьалхарча школе доладаь балхаш чакх а даьха из а керда дешара шу долалуш кийча хургья», — аьлар министра.
Массанахьа школе хьожаш чакхваьнначул тIехьагIа школа кулгалхочоа тIадиллар Мехкдас, дешара гIишлон пенаш эшача тIахьехамца кийчде, аьнна. Къаьстта цо белгалдир школа стадион а, берий майда а ГТО боарам кхоачашбе аьттув хургболаш кийчаяь хила еза, аьнна.
Лаьттах йоаллача гIата чу кIаьнкашта лаьрхIа занятеш дIакхахьа моттигаш Iалашъярца пхьоаллеш хьаелла еза аьнна хеташ ва Мехкда, лакхерча гIаташкара классаш дешара мукъаяргйолаш. Цул совгIа, юртарча кагирхошта лаьрхIа низъоамала моттигаш а хьаелла мегаргья цу чу, аьнна белгалдир Баматгире Юнус-Бека.
Школа кулгалхочо хоам бир, кастлуш школан коа берий технопарк «Кванториум» хьаелла лерхIаш ба шоаш, аьнна.
ХIанзалца маьркIижал тIехьагIа бийсанна школера чуухаш хиннача берашта хинна хало хIанзчул тIехьагIа хургьяц. Царна лаьрхIа геттара хоза, эзди, тIеххьарча технологеца кийчъяь школа я хьалха яьгIа къаьнара школа дIаяьккхача юрта хьалъяь.
Иштта дIахо юрта хьалъяьча берий беша гIишлонга хьажа вахар Евкурнаькъан Юнус-Бек. Из я укх шера кхы дукха ца говш ший болх дIаболабе безаш йола 220 бер чуэцаргдола керда берий гIишло. ЦIа хьалдетта а даьнна, тIехьанахьара а чура а тоадеш къахьегама болх ба карарча хана цига дIабодаш.
ГIишло йиллача ханал тIехьа ца йоалаш ший ханнахьа болх бе йолалургйолаш тIахьожам беш а, балха кхоачамга хьожаш а хила, аьнна тIадиллар Мехкдас цу даькъе бехктокхаме йолча урхаленна.
Мехкдаьца Баматгире Юнус-Бекаца цхьана баха хилар ГIалгIайчен правительства тхьамада Йовлой Заьлимхани, мехка ГIишлон министр Вешкарньакъан Османи, юрта администрацен кулгалхо Налгнаькъан ХIарони, иштта гIишлош хьалъеш йолча организацей викалаши.
Дукха хана денз юрта бахархой хьийга цар сатийса хIама да деша даха ха йоацача берашта ха яккха берий беш юрта хилар. ХIаьта из укх шера кхоачаш хулаш да.

Матенаькъан Илез

№ 37-38 (12172-173), ера, 14 март, 2019 шу / Четверг, 14 марта 2019 года

Добавить комментарий

Ваш e-mail не будет опубликован. Обязательные поля помечены *