ТIехбола говзанчаш кийчбар бахьан долаш баркал алар

Росси Федерацен Правительстве чуйоагIаш йолча Финансови университета ректорца Эскиндаров Михаилаца вIашагIкхетар хилар ГIалгIайчен Мехкдаь Евкурнаькъан Юнус-Бека. Цига цар дийцар ГIалгIай Мехкарча студентий дешара гIулакх миштад, дешара тIа мишта кхув уж. Цул совгIа, Баматгире Юнус-Бека, 100 шу дизарца универститет даькъала ювцаш ловца баьккхар. Белгалде деза укх шера март бетта 1 дийнахьа университето из ди дездаьлга.

Иштта вIашагIкхетаре дакъалоацаш вар вице-премьер, ГIалгIайчера Москве массаза викал вола ЦIечой Iалихан.
Карарча хана, РФ Правительстве чуйоагIаш йолча Финансови универстите дешаш гIалгIаех 100 дешархо ва. Евкурнаькъан Юнус-Бека яхачох массехк шера шоашкахьа дипломаш дола дукха говзанчаш кийчбаьб университето. Царна юкъе ба налоговикаш, менеджераш, финансисташ, социологаш, политологаш.
«ЛерхIам болаш да, ГIалгIай мехкара дешархой шоай дешара тIакхерах дола хаттараш ректора ше кулгалдеш хилар. Из доацаш ГIалгIайчен дешараи, Iилмани министерствон оагIорахьара а деш доал да, мехкал арахьа деша багIача кагирхоша лерттIа дешаргдолаш», — аьнна белгалдир Мехкдас.
Ший аргIах къамаьл деш Эскиндаров Михаила белгалдаьккхар, Финансови университето къона, тIехдика говзанчаш кийчбеш лаьрххIа къахьега, аьнна. Укхаза ВУЗе дийша баьлча шоай мехка экономика айеш къахьега дезаргда цар, аьнна хьоахадир цо дIахо.
ГIалгIай Мехкарча дешархошта гIо дарца, цар тIехдика дешаргдолаш лаьрххIа тIахьожам а беш къахьегар бахьан долаш, университета ректора Эскиндаров Михаила баркал аьлар Евкурнаькъан Баматгире Юнус-Бека. ДIахо Финансови университ хьакхелла 100 шу дизарца уж даькъала бувцаш ВУЗа кулгалхошта а, хьехархошта а, дешархошта а могашал, машар, ираз, беркат кхайкадир ГIалгIайчен Мехкдас. Иштта ГIалгIай Мехка грамота елар Баматгире Юнус-Бека ректорга, дукхача шерашка хьинаре Iилман-хьехархой болх беш, мехка тIехбола говзанчаш цар кийчбеш къахьегар бахьан долаш.

И. Айюбов

№ 39-40 (12174-175), шоатта, 16 март, 2019 шу / Суббота, 16 марта 2019 года

Добавить комментарий

Ваш e-mail не будет опубликован. Обязательные поля помечены *