Ший вахар балха хетадаьр

Хьехархо хилар – атта болх бац. Наьна мотт хьехаш вола хьехархо Дала белгалваьккха саг ва. Наггахьа сагага мара кхачац цу тайпара совгIат – ший мотт эзди хар а, хайна ца Iеш, из дIабала магар а. Цу къаьста белгалбаьннача нахах я Ведажнаькъан Хоасбота Марем.

Марема вахар а лелар а доладеннад Наьсаре, из яьй 1963 шера. Пхьилекъонгий-Юртага кхаьчад цол тIехьагIa Марем денна бIаргагорца дувзаденна дола ираз. Рузкъа хиннад ший дикал а, хозал а цу юртарча нахаца дукхагIа екъа. ХIаьта ше цу юрта болх бе йолаеннача хана денз цо шийл кхы йоккхагIa йоаца дегагIоз кхеллай берий дай-ноаной дегашка. Цун хьехархочун болх болалу Пхьилекъонгий-Юртарча шоллагIча ишколе 1984 шера. ЗIамигача берашта хьехаш къахьег цо цу юкъа. Марема балха бехктокхам а, лоархIам а дика кхетабора шийна массаза дас-нанас хьалхадахар бахьан долаш, дешар эшаш хилар а, къахьегам хьаьнала ца хилча Дала тIаэцарг цахилар а.
2008 шера Марема чакхъяьккхар ГIалгIай Паччахьалкхен университет, гIалгIай мотт хьехаш йола хьехархо а хинна дIачIоагIъеларца. Цун вахаре дукха хиннаб эздий хьехархой, хIаьта цо массаза къаьстта белгалйоаккх Кхоартой 1айшет цун кхоллама никъ а, хьехам а хьоабирца. «Наьна мотт бовзаш, цун кIoаргленаш тохкаш, дукха хIама дайзад сона», — йоах Марема. – Метта лард чIоагIъе гIертарах массаза гарга хиннаб сона цун болх».
Тахан цхьаккха олимпиада а, яхьараш а, флеш-моб а дIайодац Марема дакъа ца лоацаш. Наьна мотт берашта бовзийта гIерташ, мотт шийла тIаэцачарна безабалийта гIерташ, керда наькъаш юкъекхувлаш, хоза уйла-нигат совдоахаш ма даггара къахьег дикача хьехархочо. Раьза бола дешархой ди массаза дала дуккх-дукхагIа ба. Дешара ха чакхъяьлча а, уж цунцара къасташ бац. Дийша баьнначул тIехьагIа а уж хьоашалгIа ух цунцарча безамо дIабехаш.
Марема болх министерство а, ИПК, НИИ болхоша а дуккхаза белгалбаьхаб, цунгара хьабоала пайда лакхача маьхе увттабеш. ХIаьта укх деношка йолалуш ЕГЭ я, гIалгIай метта хетаяь. Цун Дала низ лулба дешархой Iомабе а, уж нийсача новкъа баха а.

Новрузнаькъан Макка

№ 44-45 (12179-180), шоатта, 23 март, 2019 шу / суббота, 23 марта 2019 года

Добавить комментарий

Ваш e-mail не будет опубликован. Обязательные поля помечены *