Бераш Iилман къахьегама юкъеозар

Укх тIеххьарча итт шера Iалаьмате дукха керда школаш, массайтта завод, фабрика, производственни комплекс, спортивни, культурни гIишлош, берий бешамаш, хьальяьй ГIалгIай Республике. Цу кердачарех я Наьсарера №15 йола школа. Вай замано дIадехарий терко еш хьальяь я дешара заведене гIишло. ХIаьта гонахьарфа лостам а хоза, товш, аргIа йолча куцашца мегаш ба.

Аланза далац вай школашка берашца Iилман къахьегам дIабахьара, цар вахара маькарло совъяккхара, дешар царна дIаIомадара, дунен Iилма довзийтара декхарашта хадданза къахьегаш хилар. Цу даькъе укх деношка, нийсагIа аьлча 30 марте цу школе хилар «Са зIамига Даьхе: Iалам, культура, къам» цIи йола дешархой «Открытие» яха хьалхара Iилман–практически конференци.
Цига дакъа лоацаш дар 1-ча классашкара денз 10-ча классашка кхаччалца дола шовзткъеи шиъ бер. Цу конференце яр Iобелгалъяь номинацеш: «Гуманитарно-экологически техникаш», «Iадатий культура», «ЗIамигача Даьхен дийна символ», «Iалам, культуреи къами лорадара публицистика»; «Лингвистий» клуб, «Адамий сакхетаме».
Цу школа дешархоша Iилман даькъе хьалхара дIадихьа вIашагIкхетар дар из. Цхьабакъда школа дешархой боарам бола конференци а яь сабарде лаьрхIа бац уж. Царна лов республикан, Къулбаседкъа–Кавказски Федеральни округа, Ерригроссийски, Дуненхалкъашта юкъерча конференцешка, Iилман симпозиумашка, конкурсашка дакъа лаца. Школа директора Малсагнаькъан (Йовлой) Iийсай Любас аьлар конференци хьаеллача ше къамаьл деш:
– Укх вIашагIкхетара керттера Iалашо я берий сакхетам лакхбар, царна Iилман говзал йовзийтар, хьехархой Iилман-методически болх совбаккхар, берий дешара маькарло лакхъяр, дешархошеи хьехархошеи Iилмани педагогически цхьана къахьегар чIоагIдар. ДIахо йодача хана вай бераша дакъа лоацаргда республикан а цул арахьа дIахьоча а дешархой конференцешка. Ер таханара Iилман-практически конференци дIахьоча доккха дакъа лаьцар вай школа хьехархоша. ХIаьта сона лов къаьстта баркал ала ТIумхой Бекхана Азайнеи Галайнаькъан Хьажмурда Заремайнеи, вай школа берригача болхлошта, цар таханара берий Iилман кхетаче дIаяхьара новкъостал дарах.
Укхаза аланза далац вай республикерча дешархоша, берий Iилман конференцешка, семинарашка, конкурсашка дакъа лацарал совгIа, цига хьалхара моттигаш йоахаш хилар. Наьсарен №15 йола школа, вай заман дIадехарашца нийса, хоза лостам болаш хьалъяь гIишло я, берашта дешар Iомаде мел эшарий Iалашо чу а йолаш. Укх ишколе деша 720 моттиг я. Из болх бе йолаеннай 2018 шера 1 сентябре. Белгалде деза цу тайпара керда школаш вай республике дукха хьалъяьлга а дIахо хьалъеш йолга а. Бахьан из долаш ГIалгIай Мехкарча берий дика аьттув хургба дешар дика Iомаде, Iилма довза, сакхетам лакха болаш хьалкхе.

С.Мерешков

№ 50 (12185), ера, 4 апрель, 2019 шу / четверг, 4 апреля 2019 года

Добавить комментарий

Ваш e-mail не будет опубликован. Обязательные поля помечены *