Духхьал котало мара ца йоаккха «Танк»

Шийх «Танк» аьнна цIи йоаккхаш вола Талднаькъан Мухьаммада котало енай Белоруссе дIайихьача «Кубок прайда» яхача халкъаштаюкъерча дзюдо турнире дакъалаьца. Шин оагIорахьа ха белгалъяьча ханашка латаш хиннав дзюдоист – 2006-2007 шерашкеи, 2008-2009 шерашкеи баь ха йолча спортсменашца. Цу шинна а ханара болча шийца товсабенначарел котваьнна царел тIехволаш пьедестала лоархIамеча лагIа тIа ваьлар вай мехкахо.

Турнира даькъе латаш Талднаькъан Мухьаммада «За лучшую технику» яхача номинацех котало яккхарца эзди совгIаташ даьхар. Белгалде деза, «Кубок прайда» яха дзюдох йола Халкъаштаюкъера II турнир Гомель шахьара тIех йолча «Динамо» яхача низъоамала манеже дIайихьа хилар.
Латархошта юкъе хьалхара хила чам болаш 1000 гаргга кагирхо тоссавеннавар 2006-2007, 2008-2009, 2010-2011 шерашка баь ханаш йолаш. Уж берригаш баьхка бар Белоруссера, Россера, Израилера, Литвера, Латвера, Украинера, Узбекистанера, Таджикистанера, Молдовера, Грузера иштта кхыча паччахьалкхешкара а.
Латарах котбайначарна даглоацама совгIаташи, кубокаши, грамоташи, майдилгаши йийкъар. Цул совгIа, тIехдола спортивни дувхар дийхар массаболча доакъашхошта.
Иштта Латве дIайихьача дзюдох йолча «YOUNG STARS JURMALA 2019» яхача турнире а дакъалоацаш хилар вай мехкахой Талднаькъан Мухьаммади цун воша Ахьмади. Ше массаза латача тайпара 2008-2009, 2006-2007 шерашка баьча ханаш йолчарца тоссавелар Мухьаммад. Ший ханархошца летача дошо даккхарца хьалхаваьлар из, хIаьта боккхагIчарца летача шоллагIа моттиг яьккхар цо.
Ахьмад кIувса тIа ваьлар 2006-2007 шера баь ха йолча ший ханнархошца тоссавала, цига шоллагIа моттиг йоаккхаш латар из.
Укх турнире дакъа лоацаш 1000 совгIа доакъашхо вар 2002-2004, 2004-2006, 2006-2008, 2008-2010, 2010-2011 шерашка баь ханаш йолаш. Аьттув хилба вай мехкахой дIахо йодача хана а тIехйола коталонаш яха.

Матенаькъан Илез

№ 50 (12185), ера, 4 апрель, 2019 шу / четверг, 4 апреля 2019 года

Добавить комментарий

Ваш e-mail не будет опубликован. Обязательные поля помечены *