Къаман проекташ кхоачашъеш

Подмосковьера Сбербанка Корпоративни университете апрель бетта 4-6 деношка дIахьош хиннача «Национальные проекты – этап «реализация», яхача кхетаче дакъалоацаш хилар ГIалгIайчен Мехкда Евкурнаькъан Баматгире Юнус-Бек.

Иштта из санна цига баьхка дакъалоацаш бар: Россе Федерацен правительства доакъашхой, вице-премьераш, федеральни министраш, мехкий кулгалхой, проектни офисий кулгалхой, бизнес-цхьанкхетара викалаш, иштта къаман проекташ кхоачашъеш йолча паччахьалкхен дегIаахара институтий кулгалхой а. Кхаь дийнахьа дIайихьа лерхIаме кхетачен чаккхе еча вена дакъалоацаш Россе правительства тхьамада Медведев Дмитрий а хилар.
ГIалгIайчен Мехкдаьл совгIа, гIалгIашкахьара баха кхы а хьакимаш бар цига, проектни офиса кулгалхо Малсагнаькъан Бекхани, Мехкдаь гIонча-дагвалархо вола Вешкарнаькъан Тамерлани, шо шоаш болча къаман проекташта тIехьа бехктокхаме бараши.
Кхетаче дIахьоча юкъа белгга вIаштIехьаяьккха «круглый стол» оала ийс тоаба яр. Федеральни, региональни даькъе къаман проекташ йизза кхоачашъяра а, уж дегIаяхкара а гIулакх дийцар гулбеннараша, лакхача боараме болх чакхбаккха аьттув хургболаш. Иштта дийцар проекташ кхоачашъеча юкъа масса мехкашкарча говзанчашта хулаш йола духьаленаш малагIаш я а, уж яшхар мишта хила деза а. ХIара мехка малагIа къаман проект мишта кхоачашъе еза, малагIча халонашта мишта духьалваха веза дувцача, кхетачен доакъашхой дIакхетабеш болх бир вIашагIкхетар дIахьошхинначар. ХIара дош тохкаш дийцар, дикагIа шоай болх вIаштIехьабаьннача мехкашкара масал а эцаш, кхычахьа а болх тIехдика дIабахьа безаш хилар.
Евкурнаькъан Баматгире Юнус-Бека дакъалоацаш хиннача «Развитие особых территорий – Дальний Восток, Северный Кавказ, Арктика», яхача вIашагIкхетаче хоаддаме дувцаш дар, СКФО мехкашка къаман проекташ кхоачашъярах дола дош. ВIашагIкхетара доакъашхоша яхачох Россе паччахьа Владимир Путина къаьстта белгалдаь хиннача целевой кхоачашдарашкахьа яхье бовлара гIулакхаш Iалашде деза, АПК, туризма, инвестиционни гIулакх тIаозара, балхазал юхатохара, кагийча мехкашка йоккха паргIато Iалашъера даькъе лаьрххIа къахьегаргдолаш.
«Къаман проекташ кхоачашъяргахьа чIоагIа эшаш да тIахьожам бар. ХIара объект гургйолча тайпара аьттув болаш Iалашо яьй вай. ХIара проект йизза чакхъяккха йиш хургйолаш къа а хьийгад вай, керттера моттигаш белгалъяхарца. Болх хIанзле дIаболабеннаб, цунца цхьана къахьегаш хила беза масса проекта доакъашхой а», — аьнна белгалдир Россе правительства тхьамада Медведев Дмитре.
Цо яхачох, укх тайпара вIашагIкхетараш дIахо а дIакхахьа уйла йолаш я федеральни юкъарал, мехкашка хьагучадаьнна гIалаташ а, халонаш а ханнахьа дIанийсдаь юстардоахаргдолаш.
Белгалде деза, ГIалгIайче I2 къаман проект чуйоагIаш йолча 67 федеральни проектех 47 проекте дакъалоацаш хилар. Цу еригача а 47 проекташта кийчдаь паспорташ а да. Ер шу долалуча хана Евкурнаькъан Юнус-Бека федеральни министрашца дукха вIашагIкхетараш дIакхихьад, уж еррига проекташ шоай ханнахьа хила езача боараме кхоачашъе аьттув хургболаш.

И.Айюбов

№ 53 (12188), шинара, 9 апрель, 2019 шу / вторник, 9 апреля 2019 года

Добавить комментарий

Ваш e-mail не будет опубликован. Обязательные поля помечены *