Экономика даькъе Iарбий мехкашца гIулакх леладе кийча я ГIалгIайче

Россе керттерча шахьаре Москве дIайихьача «Арабия-ЭКСПО 2019» яхача IV Халкъаштаюкъерча выставке дакъалоацаш хилар ГIалгIайчен Мехкда Евкурнаькъан Юнус-Бек. Укхаза цхьана гулбенна 22 Iарбий мехкашкареи, 85 Россе мехкашкареи доакъашхой бар. Евкурнаькъан Юнус-Бека дакъалаьцар Российско-Iарбий гIулакха совета XII сессе. Цар дар тохкаш, долчунга хьожаш чакхвоалача юкъа доазол арахьарча инвесторашца дIа-хьа бовзар хиларал совгIа, Ирана бизнеса викалашца бувзам лелабара гIулакх даьшхар Мехкдас.

ГIалгIай Мехкара яхача тоабан чу боагIаш мехка сенатораш Чиленаькъан Мусаи, Хамченаькъан Билани, паччахьалкхен дума депутат ГIазгиренаькъан ЮшаIи, ГIалгIайчен экономика министр ТIоаршхой Умалати, Мехкдаь гIонча-дагвалархо вола Луай Юсефи кхыбараши бар.
Выставка дIахьоча 12 мехка йоккха промышленни предприяти дIайовзийташ дола стенд кийчдаьдар ГIалгIай Мехкара бахача тоабанхоша. Из доацаш, ГIалгIай Мехка хьайоаккхаш йола экологически цIена продукци а йихьаяр. Цул совгIа, массаболча Россе мехкашкара туристически хьал гойташ дола юкъара стенд оттадаьдар Минкавказа викалаша.
«Тахан ГIалгIайчен экономика ма хетта алсамйоалаш йоагIа. Цудухьа Iарбий мехкашца торгово-экономически бувзамаш шерде чам болаш да тхо, къаьстта тIунал йоацача экспортах. Сом, хаьс, туристически Iуналаш да уж. Къаьстта цу оагIорахьа тIехьарча шерашка доккхий толамаш даьхад ГIалгIайчено», — белгалдир Мехкдас Баматгире Юнус-Бека.
Цо яхачох, мехка экономика хьал, ма хетта айлуш дегIадоагIаргдолаш доазол арахьарча мехкашка хIама лоаттае чам болаш я ГIалгIайче. Уж ба, цхьан шера 25 тоннага кхоачаш сельскохозяйственни кхоачам, Iажаш, гIамгIаш, хьачаш, кхы бола сом а. Иштта цхьан шера 20 тонн модз лоаттаде а аьттув ба ГIалгIайчен. Из доацаш 3 млн секций – кIала батареяш, 6 эзар тонн кIала профиль, 5000 тонн полиэтиленови, полипропиленови турбаш, 70 млн Iоакъингаи, 100 млн хьамчаи шушашкара минеральни газа техаи тоханзеи цIена хий. Из деррига цхьан шера Iалашде йиш йолаш я ГIалгIайче.
Ирана бизнеса викалашца къамаьл дийцар Евкурнаькъан Юнус-Бека гIалгIаша оттадаьча стенда хьалхашка. Доазол арахьара бизнеса новкъости ГIалгIайченца бувзам лелабе чам болаш ба хьайбашлеладар, АПК даькъе. Цигга дувцаргдолаш гIалгIай Мехка хьоашалгIа бийхар Мехкдас Iарбий мехкара викалаш. Шоаш бехар тIа а ийца Иранерча предпринимателаша аьлар, кастлашха тоаба вIашагIа а теха шуца экономика даькъе дош дувцаргдолаш доагIаргда тхо, аьнна.
Къилбаседа Кавказа инвестиционни кхоачама хетаяь яр форума къаьстта сесси. Минкавказа хьалхара заместитель волча вай бизнеса викала Байсултанов Одеса аьлар Iарбий предпринимателашка, СКФО даькъе бувзам лелабе шоай дукхагIа чам бар агропромышленни боахам ба аьнна. Цо яхачох, тахан цу даькъе Россе доазон тIа хьалхарча метте латташ я СКФО оалхазараш, дулх, хаьс, сом, шура, ги кхыдар Iалашдара, хьувкъадара. Цул совгIа, Кавказера гIулакх хьаьналча наькъаца чакхдоаккхаш а да, аьнна белгалдир цо.
«Тхай мехкашка хьахулаш йола а арахецаш йола а хIама шунцига хургйолаш, цу оагIорахьа къахьега чам ба тха. Туризм Кавказе геттара дегIайоагIаш йола оагIо я. Тхогахьа лоамаш да, цIена дарбан фо да, дунен тIа цIи хеза курорташ я. Туризма даькъе Iарбашкахьара укхаза СКФО лоаман-когсоалоза курорташка нах хьаухаргболаш цу оагIорахьа а болх бе чам ба тха», — аьлар Байсултанов Одеса.

И. Айюбов

№ 54 (12189), ера, 11 апрель, 2019 шу / четверг, 11 апреля 2019 года

Добавить комментарий

Ваш e-mail не будет опубликован. Обязательные поля помечены *