ЗIамигача тикагара – йоккхача гипермаркетага

СКФО йоккхагIчарех йола торгово-производственни комплекс «Строймаркет» хьаеллача дакъа лоацаш хилар балха гIулакха ГIалгIай Мехка вена, АО «Корпорация «МСП» яхача юкъарчен керттера кулгалхо Браверман Александри ГIалгIайчен Мехкда Евкурнаькъан Баматгире Юнус-Беки. Строймаркет хьайийлай Наьсар-Керте боккхача федеральни наькъаца.

Мехкдас Евкурнаькъан Юнус-Бека белгалдечох, ер коммерчески аргIанара гIишло хьаелларо бизнеса оагIорахьа къахьегачарна масса оагIорахьа ма хетта аьттув лургба. ЗIамига бизнес лелаечун, цо къахьегарга хьежжа йоккхагIйолча бизнесага кхача аьттув хургба.
«ЗIамигача а, юккъерча а предпринимательства хьисап ГIалгIайчен экономика дегIаяргахьа керттерчарех цаI да. Цунга хьежжа инвестицеш тIаозари, бизнесаца бувзам лоаттабари, из гIулакх лерттIа боагIача боараме чакхдаргдолаш цу оагIорахьа эшашбола кхоачам Iалашбари балхагахьа керттерчарех дола декхар да тхона. Сона гучох, масала ер «Строймаркет» хьайийла предприяти санна йоккха йоаца тика хьаелларца, тIехьагIа дукха чулоацам бола, шера компани хьахиллал къахьега аьттув хилар тахан вайна тешал деш да, мехка цунгахьа лакха эшам хилар», — аьнна дийцар Мехкдас.
Корпораци МСП а ПАО «Сбербанк» яхача юкъарчено гIо дирца хьалъеттача гIишлон чу 100 керда балха моттиг Iалашъе вIаштIехьадаргда, цул совгIа, хIара шера 62 млн сом налог дIачуйохийтаргья цо федеральнии, мехкеи бюджете.
«Укх тайпара проект кхоачашъе вIаштIехьадалар бакъдеш да, ГIалгIайче моллагIйола бизнес атта кхоачашъе аьттув болаш мохк хилар. Укхаза лерттIа бизнеса кхоачам Iалашбергболаш гIо деш хьинаре бувзам лелабергба оаха ГIалгIайчен администрацеца цхьана», — аьнна белгалдир Браверман Александра.
Цу тайпара ГIалгIай Мехка хьалхара хьайийла йола гипермаркет 25 эзар кв.м моттиг дIалоацаш я. Хьадувцачох укхаза оттаяь оборудовани тIехйолчарех я. Гипермаркета доазон тIа Iалашъяь 500 машен дIаоттае моттиг я. Инвестор а, «Строймаркета» кулгалхо а волча Дахкилгнаькъан Бахьаудина яхачох, укхаза хьахецаш хургда шоаш хьадеш дола кораш, наIараш, гипсокартон. «Оахош лелабеча балхага хьежжа оаха лерхI, федеральни наькъаца ер гипермаркет уллаш хилар бахьан долаш, ГIалгIайчен бахархошта юкъе хиларал совгIа, лоалахарча мехкашка а цIихеза ер хилийта», — аьнна дог тешаш дийцар бизнесмена Бахьаудина.
Из доацаш, Дахкилгнаькъан Бахьаудина дийцар, дIахо йодача хана укхаза торгово-развлекательни центр «Мегаполис» хьаелла лерхIаш ба шоаш, аьнна. Укхаза шоай бизнес малха яккха а, шоай предпринимательски балхаш дIакхахьа а аьттув хургба дукхача йоккхий а кагий а предприятей. Теша дог доагIа, ма хетта болх а беш, мехка торо лакхъеш, ди тIехьа пайда баргахьа совъювлаш «Строймаркето» болх дIабахьар.

Матенаькъан Илез

№ 55-56 (12190-191), шоатта, 13 апрель, 2019 шу / суббота, 13 апреля 2019 года

Добавить комментарий

Ваш e-mail не будет опубликован. Обязательные поля помечены *