Магас шахьара 1076 шу дузаш

Цхьа кIира ха мара йиссаяц Магас шахьара ди дезду ха хьатIакхача. ХIанзле из цIай дезде кийчлуш я ГIалгIайчен керттера шахьар. Магаса 1076 шу дизара хетадаь дола цIай-вIашагIкхетар дIадахьа лерхI апрель бетта 20 дийнахьа. Цун мэр волча ЦIечой Беслана яхачох укхаза бийхаб Россе кхыча шахьарашкара хьаьший а, цIихеза бола эстрада иллиалархой а. Цул совгIа цIайга дакъалаца бахка безаш СКФО шахьарии дай а ба.

«Алания» яхача майдан тIа а, иштта къахьегама культурах, спортах, туризмах йолча юкъарал йолча а дIахьоргдолаш да Магаса 1076 шу дизара хетадаь дездаь вIашагIкхетараш. Укхаза хьабоагIача хьаьшашта лаьрхIа сакъердаме программа кийчаяьй Россе а, ГIалгIайчен а эстрада цIихеза артисташ юкъе а болаш. CалоIама ха дIахьош хургья 10 сахьат Iуйранна даьлчахой 8 сахьат сайранна даллалца. Программа кхоачашъеш хургва цу гIулакха лаьрххIа оттаваь Россе заслуженни артист Дюжев Дмитрий», — аьнна хоам бу шахьара дас «Интерфакс-Юг» яхача агентствага.
ДIахо шахьара бахархой а, хьаьший а хьажа аьттув хургба тай-тайпарча яхьашка, выставкашка, шоушка. Магаса ден хетадаь цIай дерзадергда «Алания» яхача майдан тIа бIаь метр лакхал йолча Барта-гIала тIара фейерверкаш товсарца.
Белгалдаккха доагIа, хIанзара Магас 1994 шера Iойиллай ГIалгIайчен хьалхара паччахь хиннача Овшнаькъан Руслана амарца 1239 шера йохайаьча Аланой керттера шахьара иллача метте. «О строительстве столицы Республики Ингушетия», яха цун бух беш долча указа 1994 шера апрель бетта 15 дийнахьа Россе паччахьа Ельцин Бориса кулг яьздаьд.
Декабрь бетта 2000 шера Россе паччахьо Путин Владимира кулг яьздаьд «О присвоении столице Республики Ингушетия наименования – Магас», аьнна долча федеральни закона. Цигара денз хьайоагIа Магас ГIалгIайчен столица йолаш цу ханналца Наьсарен тIалаьтта из дукъ шийна тIа а ийца.

Бохтарнаькъан ХIарон

№ 55-56 (12190-191), шоатта, 13 апрель, 2019 шу / суббота, 13 апреля 2019 года

Добавить комментарий

Ваш e-mail не будет опубликован. Обязательные поля помечены *