Хьалхара хьукъам кастта хургба

ДIадахача шера оаха яздаьдар шахьар Сунже хьаеш лаьттача йоккхача кердача теплицах лаьца. Цу хана, теплица хьаеш хинначар яьхачох 2019 шера бIастий хьалхара помидораши нарсаши хьахургья аьнна дар. Бакъда, гIулакх мичча тайпара дале а дукхаш тешаш бацар из вIаштIехьадаргда аьлча.

Укх деношка Шолжа районе гIолла хьожаш чакхвоалаш ГIалгIайчен Мехкда Евкурнаькъан Баматгире Юнус-Бек ваха хилар «Сунжа» яхача мехка йоккхагIчарех йолча теплични агрокомплексе. 20 га боарам болча лаьтта промышленни теплични комплекс ГIалгIай Мехка хьалъярах дола дош дувцаш цу тIехьа барт баьбар соахка Соче дIайихьача «Сочи – 2019» яхача Россе инвестиционни форуме.
«Проект кхоачашъяро мехка таро лакхъяра тIехьа аьттув луш гIо дергда. Иштта 200 сага къахьега балха моттигаш а Iалашъергья. «Манар», «Черри» яха томаташ 10 га боарам болча метте хIанзле дIаегIа хьувкъаш я. Цхьан-шин кIира кхы даьлча хьаяха мара ца езаш помидораш кхаьча, хьалхара хьувкъам чуэцаш хургба къахьегамхой», — аьнна язду Евкурнаькьан Юнус-Бека Инстаграмма ший оагIон тIа.
Проект кхоачашъечар лерхI, ГIалгIай Мехка помидорий, нарсий кхоачам Iалаш барал совгIа доазол арахьа а «Сунжа» яхача теплични агрокомплексера хьувкъам дIабохка а, цунга хьежжа мехка таро айеларгахьа къахьега а. Теша дог доагIа, ма хетта из проект кхоачашъе цар вIаштIехьадарг хиларагI.

Матенаькъан Илез

№ 57 (12192), шинара, 16 апрель, 2019 шу / вторник, 16 апреля 2019 года

Добавить комментарий

Ваш e-mail не будет опубликован. Обязательные поля помечены *