ТЕРКО Е ВАЙ НАЬНА МОТТ IОМАБAРА

ХIара сага ше-ший терко я. Еций? Цхьанне йоазонца хул терко, вокханна кулгашца болхбар дикагIа хета. Фордаш тохкаш ба цаIаш, вожаш айлам хьатахка гIерт шоай боалача аьттонца.

Шоана ма гу, са терко меттацара я, къаьстта йоазув дарца. Сона хоза хета из болх. Сайна гуш долчох а айса зувш хьадоагIачох а лаьца язду аз, сай хетар юкъехоттар а долаш. Хоза хийта хоамбарах лаьца е бIагалдаьннача ногIалах ши-кхо дош алар а долаш дIачакхбаккха гIерт со, айса дIахьош бола йоазона болх.
Наггахьа, вIалла хаза доацаш наха юкъе леладеш доаца дош кхоссарца е хозагIча а, дикагIча а, нийсагIча а оагIонгахьара хьабелгалдаьккхача дешаца Iоязъе гIерт со айса къахьегаме вIашагIхетташ йола йоазон кеп. Дукхчар кхета цаде тарлу, амма, шозза е кхозза дийшачул тIехьагIа маIан кхетаде а чулоацам тIаэца а геттара кепа оттаме лоаттаде хьож со, айса наха хьагучадаккха аьнна лаьрхIа дола гIалгIай меттала йоазув.
Укхаза эрсий дош тац, гIалгIай дош дикка кхоачам а хулаш геттара товш хьадоагIа, бакъдар ала велча. Сона иштта хета, цу тайпара язде мара чам а ма оттац са, наггахьа санна из ишта ца хилча. Цу тIа соц мел дола дагалоаттамаш а, дагалоацамаш а, уйланга вахар-венар а доацаш.
ГIалгIай меттал язде безам хилар кIезига да аьнна ала дезаш да. Шоана шоашта а дика ховш ма дий, вай мотт дIабувцар Iояздечунца цхьана вIашка ца боагIилга. Багара арадоала алап каьхата тIа кхыча тайпара дож, «Iаь» аьнна хетар а долаш. Цудухьа Iомабе безаш ба из, дикка а, кIоаргга а, хаьдда а. Дошлоргаш а да вай тайп-тайпара арахийца лелаш, сов уж кепатохача гIоне эргадаьнна дIаэтта долаш, корта хьувзaлу хьа, Iайха «ванагIа» аргдолча дIатIавоаккхача хьале отта хьо, де хIамма а доацаш. Хьовзам мишта бац из, цхьанне ер цIе бос ба, вокхо, а, баьццара бос ба из хьога оалаш хилча. Цхьан дошлорга тIа «а» латтача вокха дошлорга тIа «б» яздаь латта, нийсдар а харцдар а цаI да яхилга да-кх из, духхьала фу бе да из сихаоаларга тIа дIатIавоалаш хилча, аьнна дита йиш яц из.
Сай йоазош тIа юкъе цу тайпара товшдоацараш ца леладе хьож со, хIана аьлча хозача меттаца Iоязбаь болх наха а хоза хет, из Iодеша а чам хул. Iурра ден сарралца Iаморга тIа вагIа яхилга дац из, деш дола кхайкарал да, дийнахьа пхиъ е итт дош Iомаде, цаI е шиъ оагIув гIалгIай меттал деша, бе башха дац исбахьален книжка хилда из е багахбуцамаш, фаьлгаш чулоаца дешорг.
Аьттув баьннача минуте, шоана а могаргда гIалгIай меттал шоай керттерча уйлашта хозача дешашца каьхата тIа зарба тоха. Бакъда, наьна мотт Iомабара терко хила еза вай, тIаккха мара кхоачам хургбац вай беш болча йоазонцарча балха.
Мел безам бале а, къахьегам боацаш гIулакх хилац, дукхагIдолча даькъе йоазон бокъонаш йовза езаш хул. Из хар духьа, хоза наьха санна болх бе безаш хул – кертаца, хьаьца, сакхетамца. Иштта мара сомабалац йоазон никъ, иштта мара гучадалац йоазон начIал. ХIаьта начIал гучадаьннача сахьате, из юхатоттар товш йоаца оамал я. ХIана аьлча, лаьрхIа йоазоно чулоац халкъаца бувзаме мел латташ дола гIулакх, эздел, Iаьдал, таpхьар.
Мотт Iомабар а доацаш, из каьхата тIа хоза дожаргдолаш хьакарадоаладар эш вайна таханарча дийнахьa. Цу тIа къахьега деза вай, укхаза вай поалхам хьашаьрбе беза вай. Вайна хоза Iоязде ховргдолаш а, Iояздаьр деша чам тIаотташ хургболаш а – ховш а, бувцаш а, бола мотт тахан йолаш а, йоацаш а, йолча оатхалашца хьаметтаоттабе беза. Вайна из мотт нагахьа санна тахан эшаш бале, мекъа ца луш, юха ца довлаш ма-могга хьаIамабе беза из, ховш доацар хьатохкаш, дицденнар юха хьакердадоаккхаш. ТIаккха майрра ала йиш хургья цох цхьа гIулакх хургдолга а тахан чIоаггIа эшаме пайда баргболга а.

САПРАIАЛАНАЬКЪАН Микаьил

№ 59-60 (12194-195), шоатта, 20 апрель, 2019 шу / суббота, 20 апреля 2019 года

Добавить комментарий

Ваш e-mail не будет опубликован. Обязательные поля помечены *