ГIалгIайчен керттерча шахьара 25 дизар дездеш

ГIалгIай Мехка керттерча шахьара Магаса 25 шу дизареи, къаьнарча шахьара 1076 шу дизареи дездеча цIай-вIашагIкхетаре дакъалоацаш хилар ГIалгIайчен Мехкда Евкурнаькъан Баматгире Юнус-Бек.

Магасерча цIай дездеча цIагIа концерт доладалалехь хьалха шахьара юбилеех хетадаь Россе Федерацен паччахьас Путина ловца баккхара дешаш дийшар Баматгире Юнус-Бека.
«БIаьшарен йиълагIча хана юкъа Магасах хоза, керда шахьар хиннай, мехка культура, Iилман, дешара юкъаралах цаI хинна дIа а отташ. Тахан ГIалгIайчен керттерча шахьара хьалхашка декхар латт, кертерачарех дар – цIенхашта инвестици тIаозари, предпринимательски гIулакх дагадохарах къахьегачарна гIо дари, социальнии, коммунальнии инфраструктура дегIайоалаеш тоаяри, керда балха моттигаш вIаштIехьаяхари», — аьнна дар Мехкдас Евкурнаькъан Юнус-Бека Iойийшача телеграмма тIа шахьар даькъала ювцаш хинна паччахьа дешаш.
Иштта Мехкдас Магас шахьара бахархой цар цIайца даькъала бийцар, Магас массадолча оагIорахьа толамаш дахарца дегIайоагIаш хилар белгал а деш.
«Вайна гу, тахан Магас мишта, тоалуш шерлуш а йоагIа. Хьаеллаш керда школаш, берий бешамаш, вахара гIишлош я, заманга товчча тайпара сибат тIаэцаш латт шахьаро. Эггара керттера дар – наьха вахара хьал, бахача наьха тарон гIулакх тоалуш доагIаш хилар», — аьнна белгалдир Баматгире Юнус-Бека.
Мехка бахархошта ловца баккхарца, уж даькъала бувцарца йистхилар Россе Федерацен паччахьа волча чуйоагIа берий бокъо лораярах йола викал Кузнецова Анна. Из ГIалгIай Мехка енай Магас шахьара цIай долча цу дийнахьа.
«ЛерхIаме ГIалгIайчен а, Магаса а дахархой! Со эггара хьалха ена я ГIалгIай Мехка, се хьамсарча лаьтта еча санна хетаденнад сона укхаза. Со цецяьнна гIадъюгаш да, шоай Iадаташцара шун лерхIам, боккхагIий лархIар, дезала гIулакхаш тIех мах беш леладар. Шун мехка дукха бераш долаш дезалаш дукха ба, сона хетачох из вай керттера таро а я. Укх эздича шахьара масса бола бахархой даькъала бувц аз, могашали, дезала гIулакхи чIоаггIа дика хилар ловш», — аьнна чакхдаьккхар Кузнецова Аннас ший къамаьл.
ЦIай-вIашагIкхетар дIахьош дар, ГIалгIайчен заслуженни артисташа кийчаяьча концертни программаца. Иштта Магаса 25 далар дездеча дакъа лаца вена Россе заслуженни артист Дюжев Дмитрий а вар. Магаса бахархоел совгIа укхаза баьхка кхы а мехка бахархой бар, Магас цун бахархой хиннача а ца Iеш, из шоай лоархIаш, хьамсара хеташ. Эшараш дукха дале а тахан Магас Россе кердача вахарца мул боаккхаш йолхача шахьарашта юкъе ший моттиг хьалаьца латт.
Дала даькъала йойла Магас, Дала даькъала болба цу шахьара бахархой а.

И.Айюбов

№ 61 (12196), шинара, 23 апрель, 2019 шу / вторник, 23 апреля 2019 года

Добавить комментарий

Ваш e-mail не будет опубликован. Обязательные поля помечены *