ГIалгIайчен юртбоахама таро Iалашъеш

ГIалгIайчен хIара юрта лаьрххIа тIехйола тикаш хьаелларгйолаш я, вай мехкарча юртбоахама къахьегамхой продукцеш чу а йолаш, царех бехаш бола мах базарашка болчул лохагIа хургба. Цох бола хоам бу ГIалгIайчен кертерча хоам бара сайто. Цу тайпара гIулакх хьалхадаьккхар ГIалгIайчен Мехкда Евкурнаькъан Баматгире Юнус-Бек вар СоагIапчарча дулха-шура кхоачам лоаттабеча комбинате дулха а шуран а хьал алсамдаккхар дувцаш дIайихьача кхетаче.

ВIашагIкхетар дIадодача иштта дийцар мехка грантови гIишлон хьал, цул совгIа цу хаттарца уж дагабайлар кхычахьара инвестораш тIаозара гIулакх мишта хилча бакъахьа да доашхаш. Цу наькъаца мехкара Iаьдал гIерт доахах хьабоалаш болча пайдах массайолча юрташка Iалашо е.
Евкурнаькъан Юнус-Бека белгалдаьчох дIайохкаш йола кийча продукци, мехка сельхозпредприяте чоалханеча хIамаех цаI да. Цу наха шоай товар малхадаккхаргахьа гIо хургдолаш, цул совгIа, мехка бахархошта хьаэца цIена дулхи, шураи хургдолаш а мехка юрташка а шахьарашка а тIехйола тикаш хьае аьнна хьалхадаьккхар Мехкдас цу гIулакха бехктокхаме болчарна. ЛаьрхIар чакхдоале базарашка долчул 10-20% лохагIа хургда цига маьхаш.
«Тикаш доххьал докхий балхаш леладечарна яьча а ца Iеш, фермаш лелаечарна а, шоай кулгашца къа а хьегаш шоашта хIама хьадеш болчарна а ергйолаш я. Ший мехкара продукци массаза а дикагIа хиларца белгал хул. ХIана аьлча, бокъонца йола экологически цIена продукт я из. Вай мехкара климат, цун дикагIа хилар теркал а деш, ма могга къахьегаш хила деза вай, хьайоаккхача продукцега хьежжа вай юртабоахамаш ма хетта лакхалургдолаш. Нагахьа санна кагий а доккхий а хьайбаш вай мехка дебаш дале, цунга хьежжа царех хьадоаккхаш дола шура а, дулх а дебаш хила деза вай. Хьайбаш леладу гIишлош а, тIаккха царех хьабоалаш бола пайда а дIа-хьа нийсбе эшаш йола гIишлош а дегIайоалаяргахьа инвестораш тIаозаш бола болх нийсбаь дIаоттабе беза ГIалгIайчен Правительствос», — аьнна белгалдир Мехкдас Баматгире Юнус-Бека.
ТIехьарча шерашка мехка юртбоахама хьал тоалуш айлуш доагIаш хилар а, хьайбаех хьабоалаш бола пайда Iалашбаргахьа нах сатувсаш къахьегаш хилар а гуш да. Цох дар дувцаш, из белгалдир ГIалгIайчен юртбоахама министра Галайнаькъан Хизира. Цо яхачох, хьайбаех хьабоалаш бола пайда мехка лакхбалар нийсденнад паччахьалкхено деш дола гIо бахьан долаш. 2017-2018 шерашка цу гIулакха хьахьожадаь 250 млн сом ахча дар.
«Цу ахчанца 65 388 доахан дебаде аьттув баьннаб, хIаьта 198 340 корта жаи гаьзарии Iалашдаьд. Шуран кхоачам 98 400 тоннага кхаччалца айбеннаб, дулха боарам — 6 885,2 тоннага кхаччалца», — аьнна дийцар министра Галайнаькъан Хизира.

И. Айюбов

№ 62 (12197), ера, 25 апрель, 2019 шу / четверг, 25 апреля 2019 года

Добавить комментарий

Ваш e-mail не будет опубликован. Обязательные поля помечены *