Оалкама керда хьалдаьча культура цIагIа хиннача фестивалах

ГIалгIай Республике дIахьош я къаман эхь-эзделах йола фестиваль. Цун хьалхара аргIа юрташкара бахархошта юкъе дIахьош я, цига котало яьккхараш дакъа лоацаш ба районни боарам болча яхьашка. ХIаьта цу къовсамашка хьалхале яккха тарденнараш республикански боараме яхье баргба. Ала деза цигара доакъашхой мугIарера бахархой болга, культура болхлой а боацаш. Цу дешо а гIо дергда вай хоза гIулакхаш, оамалаш къаманна йовзийтара. ХIаьта фестивала керттера декхар да, шира, карарча хана лела ца деш дола вай Iадаташ, эздела хоза куцаш довзараш белгалбахар, наха дицденнараш дагадохийтар, вай кагирхой эздел леладе тIахьехар. Ховш ма хиллара укх тIеххьарча 10-15 шера гIалгIай къаман сакхетама керттера чулоацам белгалбу эхь-эздела, гIалгIай гIулакх оалача белгалон доакъош, наха юкъе леладар лаьгIденнад.

Фестиваль вIашагI а теха цунна кулгалдер я ГIалгIай Республика культураи архивни гIулакхии министерство. ЛоархIам болаш да цу фестивала Шолжа районни дакъа, лоам йисте уллача вай Оалкам цIи йолча юрта керда Культура цIа хьадийлача дийнахьа дIаяхьар. ХIаьта Наьсарен, МагIалбика, ДжIайраха районни фестивалаш май-июнь бетташка хургъя. Белгалде деза цига 24 апреле, Российски Федераце культура министр Мединский Владимир, ГИТИС ректор Заславский Григорий, ГIалгIай Республика Мехкда Евкурнаькъан Юнус-Бек баьхка хилар. Цар дакъа лаьцар цу юрта керда хьалбаь культура кхуврч хьалсогача. Из гIишло хьалъяро гIо дергда, Оалкамарча кагирхой мукъа ха пайдане дIаяхьара. «Цига шо-шоай говзалга хьежжа халхараш де, иллеш алар Iомаде, декоративно-прикладной говзалца къахьега торо хургъя цар укхаза» аьлар, ГIалгIай Республика Мехкдас Евкурнаькъан Юнус-Бека.
ДIахо къамаьл деш, Российски Федераце культура министра Мединский Владимира аьлар: «Гаргача хана чухь йиззача форматах художественни фильмаш гойта кхаоачам цхьана оттабергба оаха… Иштта оаха лаьрхIад республике бархI культура цIа тоаде а кердадараш хьалде а»,-аьнна. Белгалданза далац, ер шу доладелча денз из культура цIа кхоалагIа долга вай республике керда хьадийларех.
ВIашагIкхетар дерзадеш Российски Федераце культура министра Мединский Владимира, ГИТИС ректора Заславский Григоре, ГIалгIай Республика Мехкдас Евкурнаькъан Юнус-Бека дакъа лаьцар экологически акци дIахьоча. Цар цIераш тIатеха кIайча дакха гаьнаш дIаегIар Культура цIен коа.

С. ЗААМИЕВ

Добавить комментарий

Ваш e-mail не будет опубликован. Обязательные поля помечены *