Магас шахьара «Боалий беш» яха проект дика чакхъяьлар

ДIадахача кIира Магас шахьара администрацен сайта тIа хоам баьбар шахьара бахархошка шоатта деннеи кIиранденнеи «Боалий беш» дIаювча дакъа лаца дIабувла аьнна. Цул совгIа шахьара дас ЦIечой Беслана а кхайкам баьбар интернета ший юкъара оагIошка, шоай шахьаре хургйолча беша гаьнаш дIайогIача къахьегаш наха дакъа лацар дезаш, уж тIабехаш. Тхоай газета оагIошка оаха а баьбар цох бола хоам.

Из дIа-хьа баьржача хана цига дакъа лаца саг воагIаргвац, эшаш болх бац из, цхьаболчар ма гIолаш цига яхаш а пайда боаца къамаьлаш дора интернета цхьайолча оагIошка. Дале а цу деношка цхьабола мехка бахархой салоIаш, е шоай коашка болх беш, е хьоалчагIашка дIа-хьа ухаш хиннабале а, Магасе шоатта деннеи кIиранденнеи боалий гаьнаш дIайогIаш шоай хьамсарча шахьара фо цIена хургдолаш, цул совгIа чам болчунна баа сом а хургдолаш къахьегаш хиннаб Магаса бахархой. Уж боацаш мехка кхыча юрташкара а шахьарашкара а нах бар укхаза дакъа лаца баьхка, шоашта маьл боаккхаш къахьегаш.
Шоаш кхайкадаьча тайпара администрацен болхлой ара а байна, цига шахьара дукха бахархой шоай берашца тIа а баьхка, кастта ГIалгIайчен керттерча шахьаре Магасе хургйолча «Боалий беша» гаьнаш дIайогIаш хилар нах. ХIаравар шийна маьл баккхарца, цу Даьла раьза хургволча вIашагIкхетарца чам болаш къахьегаш вар. «Боалий беш» хургья 1076 га ягIаш. Из боарам цу таьрахьаца белгалбаьб къаьнарча Магаса яьннача ханаца биста.
«Магасе боалий беш дIачIоагIъеш бIаьшерашка бахаргбола маьл бола вай къахьегам чу хьу вай, воашта дукха еза вай хьамсара шахьар Магас хозъярца, кхувшбоагIарашта из хургйолаш. Укхаза дакъа лоацаш къахьегаш мел хинначарна баркал оал аз, къаьстта кагийча берашта, кхувш боагIачарна», — аьнна белгалдир гаьнаш дIайогIача хьинаре къахьегаш хиннача шахьара дас ЦIечой Беслана.
Дерригача дунен тIа чIоагIа дика а эзди а лоархIаш гIулакх да моллагIа га дIайогIар. ХIаьта бусалба динга диллача боккха маьл а ба цунгахьа. Шоашта цIена фо, баа сом Iалашбарал совгIа Даьла раьза вар, маьл баккхар Iалашдаьд боалий беш дIайийначар. Га дIаегIача сага кхоачаргдолча диках дувц, ГIалгIайчен Мехкда волча чуйоагIача дин гIулакхех йолча урхален кулгалхочун гIонча волча Манкенаькъан Зембулата Iийсас:
«Даьла раьза хилва цунна, Анаса дийцад: Элчано – 1алйх1иссалату вассалам – аьлар аьнна: «МоллагIча цхьан бусалба сага га дIайогIарг ма яц, ялат дIадуврг ма дац, цу тIера оалхазаро, саго, хьайбо диача цох цунна маьл хулаш мара». Укх хьадийсага вай ладийгIача, га дIайогIа, ялат дIаде воаллача сага ший нигат тоаде деза, сона а кхычарна а пайда хилба укхох, аьнна. Наха къинтIера ваьнна а волаш цIена Даьла духьа цо из дича цунна маьл дIатIаухаргба цох. Вешта аьлча, бакъ ма дий, е саго, е оалхазаро, е хьайбо цунга хаьтта хIама а доацаш цу тIера хIама йоаккхарг хилар. ХIаьта нигат цIена хилча саг са я варгвоацаш, цкъар из юкъ дIаялча кхы дIахо цун къа хьега ца дезаш дилла маьл хила йиш йолаш болх ба из, духдувла хий санна», – иштта маьл болаш да-кх вай га дIайогIар. Магаса шахьархой цу дакъа хургба Дала аьннадале.
Цхьа эзар совгIа йола гаьнаш дIайогIаш хилча вайна ма харра дукха къахьега деза, ма хетта низ эша цу гIулакха, цудухьа шоатта деннеи кIиран деннеи болх бича, оршот дийнахьа юха а баьхка йиса массехк га дIайогIаш балха чаккхе еш къахьегаш хилар Магаса шахьара бахархой.
Болх мел дукха, хала бар аьнна барт хилча, дог ца а эккхаш дIатIаэттача дукха юкъ ялале дIачакхбоал. Укх наькъа шоай барт а, хьинар а, шоай шахьар дукха езар а хьагойтар Магаса бахархоша. Фарал духьа долаш, дукха сом хьалуш хийла Магаса «Боалий беш», Даьла къахетама ер денош геттара хоза дахкарца гаьнаш дIайогIачарна атта хиннад.
Ерригаш цу проектаца дIаегIараш лакхе белгал ма дарра 1076 га я.

Матенаькъан Илез

№ 65-66 (12200-201), шинара, 30 апрель, 2019 шу / вторник, 30 апреля 2019 года

Добавить комментарий

Ваш e-mail не будет опубликован. Обязательные поля помечены *