Мехка бахархой тIаийбара аргIанара вIашагIкхетар дIадихьар Евкурнаькъан Юнус-Бека

Мехка бахархой хаттараш дашхара аргIанара нах тIаийбар дIадихар ГIалгIайчен Мехкдас Евкурнаькъан Юнус-Бека. Цох бола хоам бу ГIалгIайчен керттерча сайта тIа. Шоай хаттараш а дахьаш тIабаьхкача наха айдаь дешаш шоайла башхало йолаш дар. Мехкдас теркалдаь даьшхача хаттарех дар – заIапал долча берашта дIа-хьа кхувла транспорт Iалашъяри, наьха фусамашкара вахара хьал тоадари, пенси даккхара гIулакхи иштта кхы дола хаттараши.

Мехкдаьга шоай хаттар а дахьаш тIабаьхкарех хьалхарабараш бар ВОРДИ яхача заIап долча берий ноаноех латта Ерригачароссе юкъарчен тхьамада Коазой Елизаветтаи, цу юкъарчен учредитель йола Къоастой Залинаи. Цар дехар дувзаденна дар, мехка гIолла а доазол арахьа а дIакхохьаш долча тайп-тайпарча вIашагIкхетарашка дакъалаца, е дарба де уж бераш дIа-хьа кхувла машен Iалашъе шоашта, аьнна.
«ЗаIап дола вай мехкара бераш арахьа дIадехаш дукха моттигаш нийслу тха, 15-20 саг дIавига аьттув болаш моттигаш хьалуш хул цкъаза. ТIаккха уж бераш дIадига йоагIаш йола транспорт цахилар бахьан долаш цига дIадаха аьттув а боацаш дус тхо», — аьнна дийцар Коазой Елизаветтас.
Мехкдас цу сахьате цу гIулакха бехктокхаме а оттаяь из гIулакх дашха аьнна дIатIадиллар ГIалгIайчен Мехкдаь а, Правительства а приемни кулгалхо йолча Овшнаькъан ПIаьтмата.
«ГIалгIайчен промышленностахи, транспортахи, энергетикаца бувзам лелабарахи йолча комитетаца барт язбе беза. Кхоъ я хац е йиъ я хац я уж цу тайпара йола автобусаш. Уж мичахьа я а хьаже, ший коляскаш а йолаш царна йоагIаш йола автобус хьаялийта, дIа-хьа болхача хана ераш лелабе аьттув хургболаш», — аьнна дерзадир Баматгире Юнус-Бека из дош.
ДIахо ший чоалхане хаттар а дахьаш, из дашхар дехаш Евкурнаькъан Юнус-Бек волча вена вар Чернобыльски АЭСе хатар хиннача хана цига хинна доакъашхо Эбарга-Юртара Келматнаькъан ХIарон. Шийна доагIаш дола пенси хьакхоачаргдолаш из гIулакх вIаштIехьадаккха аьттув балац ший аьнна венавар Асхьаб Мехкдаьна тIа. Унахочунга дикка ла а дийгIа цу сахьате ВТЕКе багIачарца бувзаме а ваьнна цу сага де доагIаш дола гIулакх диззе чакхдаккха, аьнна тIадиллар Евкурнаькъан Юнус-Бека. ХIаьта Овшнаькъан ПIаьтматага аьлар из гIулакх цхьан кога тIа даллалца мел эша каьхаташ вIаштIехьадоахаш унахочоа Келматнаькъан ХIарона эшаш дола гIулакх чакхдаккха аьнна.
Уж доацаш кхы а хаттараш дар тIабаьхкача наьха. Ала деза цу дийнахьа Мехкдаьна хаттар а дахьаш тIабаьхкарех цхьаккха саг висанзар теркам боацаш, аьнна. Цу тайпарча вIашагIкхетараша, мехка Iаьдала аьттув лу моллагIа хьатIанийсденна чоалхане хаттараш дашхарца юстара даха.

И.Айюбов

№ 65-66 (12200-201), шинара, 30 апрель, 2019 шу / вторник, 30 апреля 2019 года

Добавить комментарий

Ваш e-mail не будет опубликован. Обязательные поля помечены *