Кастта 720 дешара моттиг йолаш керда школа хьаелларгйолаш я ГIази-коа

ТIехьарча хана дукха керда дешара гIишлош хьалъеш я ГIалгIай Мехка. Цхьайолча юрташка кIалъяьгIа къаьнара школаш дIа а йоахаш, цига йоккхагIа а, дикагIа а тIехйола школаш хьалйотт, кхычахьа йолчул совгIа вIалла ца хиннача метте керда йоккха школа йотта. Из Iадат вай мехка додаш дола массехк шу да, шийца дешара моттигаш Iалаш а еш.

Хьалха ханаш яр ГIалгIайчен юрташкарча школашкара шин сменах, хьашт дале кхаь сменах бераш дешаш. Бакъда цхьан сменах мара берашта хьеха дезаргдоацаш из хаттар дашхарца юстарадоаккхаш керда школаш хьалъеш дIайолаяьча федеральни а региональни а проекташца мехка хьалйотташ йолча школех дикка пайда баьннаб.
Вай оалаш ма хиллара бераш вай кхоане я. Тахан царна дIаденнар мара лургдац цар кхоана юха хьа. Цудухьа царна тIехдола дешар Iалаш дар а, царна дикагIа йолча школаш хилийтар а, цунга хьежжа бола кхоачам хилийтар духьа къахег мехка кулгалхоша. Мехка масса йолча юрташка хьалйотташ керда дешара гIишлош я, вай берашта деша аьттув хилийта уйла йолаш.
Шийна чу 720 дешара моттиг йолаш керда йоккха кхо гIат йола школа хьаелларгйолаш я ГIази-коа яхача юрта. Цу гIулакха хьалхалаттачар хьадувцачох, 2019-2020 дешара шу долалуча хана деша бераш дIачу даха мара ца дезаш кийча хургья керда дешара гIишло. Ца ховчарна белгалдоаккх аз ГIази-коа яха юрт Экажкъонгий-Юртах ваьлча улл Яндаренцеи, БурокIалхенцеи доазув долаш.
Соахка денз укхаза хьинаре къахьегаш дIадолхаш балхаш да вай берашта цIена школа хилийтарал совгIа, царна тIехдола дешар Iалашде ловш болча къахьегамхоша. Цигара болх мишта дIабода ха а эшар, кхоачам боацаш дар фуд хьажа а ваха хилар цига Мехкда Евкурнаькъан Юнус-Бек. Цунца цхьана бар юрта администраци болхлой, ГIалгIайчен гIишлон министр, школан кулгалхо, дешара заведени хьалъеш воалла застройщик, иштта кхыбараш а.
Таханарча дийнахьа ерригача юрта ГIази-Коа бераш деша дагIаш болх беш цхьа школа мара яц. Из гIишло хьалъеттай 1977 шера. Цу хана юрт зIамига а йолаш нах кIезигагIа бахача хана тоъам болаш хиннаяле а тахан нах хьасовбовларца из школа цхьан смена берашка дешийта кхоачам болаш яц. Цудухьа из хаттар юстардаккха духьа, дешара моттигаш Iалашъяр духьа йолаяьй укхаза ер керда школа хьалйотта.
ГIалгIайчен гIишлон министерства кулгалхочо Вешкарнаькъан Османа Мехкдаьга хоам бир, карарча хана халагIа мел дола доккхий балхаш чакх а даьнна, школа гонахьара доазув нийсдеш а, дешара гIишлон тIа боагIа никъ тоабеш а, чура балхаш деш а къахьегаш ба болхлой, аьнна. Цо яхачох укх шера дIачугIоргда цу чу бераш деша.
«ЦIолой Нурдина кулгал а деш «Капитал» яхача гIишлон компане кхоачашъеш йолча Инвестиционни проектах йола школа болх бе йолалургья 2019-2020 дешара керда шу доладалалехьа. Школага дIадодар да 49 478,0 эзар сом ахча», — аьнна белгалдир министра.
Вешкаранаькъан Османа белгалдаьчох, къаьнара школа эшача кхоачамца тоаергйолаш я цох юрта берий беш хургйолаш. ХIаьта цхьан юкъа цу чу деша даха йиш йолаш хургда 190 бер.
Евкурнаькъан Баматгире Юнус-Бек тешаш ва кердача школас ГIази-коара дешара гIишлон гIулакх кхоаччаш хьалдузаргхиларагI. ХIана аьлча, кхоъ эзар совгIа саг вахача цу юрта из школа а берий беш а шорта кхоачам болаш я.
Хьалха дIаяхача ханашкахьа хинна хала деша дезаш йола зама хIанз дIаяьннай, Даьла къахетамца. Цул совгIа школа гаьна дахаш дола бераш деша хьакхувларгдолаш лаьрххIа Iаьдало хьа а хьожаяь лелаш хIара школан бераш кхувла автобусаш я. Боккха къахетам ба из. Цун хам бе а, из гIулакх лораде а декхарийла да вай, вай берашка лерттIа, доагIача боараме дешийтарца. Аз ишта хIана ях аьлча, нагахьа санна вай царга ца дешийте вай мел леладер, вай цу гIулакха мел йоаю ха, мел боабу низ, мел доаду ахча зехьа хургда. ХIаьта из хургдоацаш тIатеIIа дешийта деза вай берашка, цар кхоане сийрда а, маьрша а хургйолаш.
Матенаькъан Илез

№ 69-70 (12204-205), шинара, 14 май, 2019 шу / вторник, 14 мая 2019 года

Добавить комментарий

Ваш e-mail не будет опубликован. Обязательные поля помечены *