Наьна меттах экзамен елар

Укх деношка (7 мае) вай мехка мел йолча школашка 9-ча классе дагIача бераша наьна меттах йола экзамен елар. ХIанзалца цар яздора диктант, бакъда укх шера шоашта ховр, Iомадаьр кхыча тайпара хьахьокха дийзар цар. Вешта аьлча, экзамен керда кеп йолаш яр. Шин сахьата цар жоп дала дезар 15 хаттара, цул тIехьагIа белгалъяьча кхаь темах цхьаннех 70 – 100 дешах латта сочинени язъе езар. Йоазон балха темаш атта а сакъердаме а яр. Масала, сочинени язъе йиш яр сецара хьаракий лоархIамах, лоаман мехка хозалах, даьх-наьнах, къахьегамах, тIема зуламах, иштта кхыча лоархIамеча хIамаех.

Хаттарашта нийса жоп далара йовза езар фонетика, морфологи, дошкхоллар, синтаксис, лексика, пунктуаци, кхыдола метта доакъош. ХIара хаттара нийса жоп делча, 1 (цхьа) балл йоаккхар, сочинени дика язъярах 10 (итт) балл яккха таро яр дешархой. Балхаш дIатIа-хьатIа яздергдоацаш, КИМ-аш (контрольно-измерительни материал) пхе тайпара (пхи вариант йолаш) яр.
Сурхо тIарча ийс шера дешача школерча бераша а Iуйрийна 10 сахьат даьлча гIоне, делкъийна 12 сахьат даллалца из экзамен дика дIаяла гIерташ къахьийгар. ХIаьта цар толамца дIаелар из. Укхазарча 9 «а» классерча наьна меттах экзамен еннача 19 сагах цхьанне кхоъ яккханзар. 14 дешархочо 5 (пхиъ) йоаккхаш, 5 сага 4 (йиъ) йоаккхаш, гIалгIай мотт шоашта ховлга а безилга а хьагойтар цар. Пхиаш яьхарашта юкъе бар Алхазурова Заира, Аушева Макка, Аушева Зарета, Булгучев Мансур, Муцольгова Тамара, кхыбараш.
ДIахо деша дезаш кхы ши класс йисай цар. Уж я 10 – 11 классаш. Цу классашка гIалгIай мотт Iомабеш йола урокаш цар хургьяц. Цу шин шера алхха говзамеча литературан йоазош мара довзаргдац дешархошта. ХIаьта а мотт дIахо шаьрбе, цIенбе йиш хургья цар йоазон балхаш – сочиненеш, изложенеш, дувцараш – кхоллаш.
Наьна меттах, литературах кIира йиъ урок мара ца хуле а, уж Iилмаш дезаш болча кагирхошта ха корайоагIа шоай наьна мотт Iомабе. Царна вахаре из накъабаргхиларах шеко яц са вIалла.

С. Арчаков

№ 69-70 (12204-205), шинара, 14 май, 2019 шу / вторник, 14 мая 2019 года

Добавить комментарий

Ваш e-mail не будет опубликован. Обязательные поля помечены *