Болх бе йолаеннай динца хоттаенна радио

«ГIалгIайче» яхача Къаман телерадиокомпанес юкъ-юкъе гIолла болх а байташ динца хоттаденна хIамаш дувцаш хургйола «Онгушт» аьнна цIи йола радио болх байта йолаяьй. Цох бола хоам бир ГIалгIайчен Мехкдаьга Евкурнаькъан Юнус-Бекага НТРК кулгалхочо Агасенаькъан Къурайша.

«Цу хоам бара кечала регистраци яьй февраль бетта, март бетта цун лицензи хьакхаьчай тхога. ХIаьта апрель бетта конкурсни комисси хиннай частота хоржаш. Оаха цунга дакъа лаьцадар, из тхо хьалхадовларца тхога хьа а кхаьчай. Радиостанци болх беш хургья 88.4 яхача частота тIа. ДукхагIбола болх динца дувзаденнача хаттарашца бийза хургба, из — (50%), хьехамах, эхь лорадарах йола программаш — (30%), дIахо хоам бара хьал а хургда», — аьнна дийцар Къаман телерадиокомпане кулгалхочо Мехкдаьга.
Цо яхачох, радио бизза болх кхоачашбе йолалургья цхьан беттах латтача хана. «Юкъ-юкъе болх байта хьаяь сайт я ongusht.ru яхаш. Массехк кIира оахош хьаеш йолча программашцара болх бархI сахьатага кхоачаш вIаштIехьа боаккхаргба. Цул тIехьагIа 24 сахьатага кхоачаш деннеи бусеи бизза болх бе йолалургья радио. ЛадувгIархошцара бувзам вIаштIехьбаккха уйла йолаш да тхо, царна сакъердам, чам болча хаттарашкахьа хоаттам бирца. Цар хаттарашта жоп дала, цига боагIаш бола говзанчаш тIаозаргба оаха», — аьнна дийцар Агасенаькъан Къурайша.
ГIалгIайчен Мехкдас яхачох, радио ду къамаьл гIалгIайи, эрсийи шин меттал хила деза. «Шоашта ладувгIархой 1алашбаргахьа къахьега деза шун. ЛерттIа, наха сакъердам хургболча тайпара, программаш е еза оаша къоначарна а, боккхагIчарна а хетаяь. Теркам белаш наькъ тIа кхерамзле Iалашъярах долча деша, наха юкъера гIулакх тоадара деша, вай Iадаташта, оамалашта», — аьнна хьалхадаьккхар Баматгире Юнус-Бека.
Динца хоттаенна радио мехка хьаелларах дола гIулакх Мехкдас белгалдаьдар укх шера март бетта яьча Халкъа гулламга хIара шера еча послане.

И. Айюбов

№ 71-72 (12206-207), ера, 16 май, 2019 шу / четверг, 16 мая 2019 года

Добавить комментарий

Ваш e-mail не будет опубликован. Обязательные поля помечены *