Паччахьалкхен мехкашка берий бешамашкара хьал тоадергдолаш

РФ паччахьа а Правительствос а тIадахка декхараш кхоачашдара хьаькъе йола видеоконференци а яь Россе премьер-министра Медведев Дмитре тхьамадал а деш дIайихьача кхетаче дакъа лаьцар ГIалгIайчен Мехкдас Евкурнаькъан Юнус-Бека. Цох бола хоам бу ГIалгIайчен керттерча хоамий сайто.

ЛоархIаме дийцар дар массадолча Iаьдала оагIорахьа болх кхоачашбар лорадаьдий хар – министерствашка, ведомствашка, мехкашка. Кхетаче дIайолаеш Медведев Анатолий Дмитре белгалдир, Россе паччахьа а правительствос а тIадахка декхараш кхоачашдар дикача хьал тIехьа цахилар. Царех дукхдараш шоай ханнахьа кхоачашдиц, ханаш цхьацца бахьанашца дилла хувцалуш я.
Кхетаче дийца даьшха керттера хаттараш паччахьа а правительствос а тIадахка юкъара лоархIаме декхараш кхоачашдара хьал дар. Царна юкъе берий салаIара кхерамзле Iалашъяр а, бераш дIа-хьа дигара гIулакх кхоачашдар а, Севастополе инфекционни больница хьалъяр а, мехкашка берий бешамаш Iалашъяра гIулакх а дар.
ГIалгIай Мехка берий бешамашкара моттигаш Iалашъярах дола гIулакх дийцар ГIалгIайчен Мехкдас Евкурнаькъан Баматгире Юнус-Бека Россе премьер-министрага доклад еш. «3 шерагара 7 шерага кхоачаш ха йолча берашта юкъе 43% бераш да берий бешамашка чуийца, уж да (15 804 саг.) 21% бераш (7 7I3 саг.) электронни аргIах латт, 36% бераш (13 283 саг.) электронни аргIага дIаовтта аьттув боацаш ба, уж бахача юрташка берий бешамаш цахилар бахьан долаш», — аьнна белгалдир Мехкдас.
Цо яхачох, еррига а мехка болх беш яраш 72 берий беш я. ГIалгIай мехка 7 шерага кхаччалца ха йола бераш 71594 саг ва. Цу чу доагIаш да 3 шерагара 7 шерага кхаччалца ха йола бераш а – 36 800 саг.
Ший докладе Евкурнаькъан Юнус-Бека хоам бир 2019 шера ГIалгIай Мехка болх бе 22 берий беш йолалургья, аьнна, уж я 4 840 моттиг. ХIаьта 2021 шу чакхдалалца йолча хана «Демография» яхача къаманпроектах мехка хьалъергйолаш я 1760 моттиг дIалоацаргйола кхы а 8 берий беш. Цо аьттув лургба 55% 3 шерагара 7 шерага кхоачаш ха йолча берий боарам лакхбе. ХIаьта 3 шерга кхаччалца ха йолча берий боарам 7% кхоачаргба.
Цу тайпара эшаш йола моттигаш хьатIаеш болх бича 2012 шера ГIалгIай Мехка 80% кхоачаш боарам айлургба. Заявкаш дукха хиларца баьча тохкамашца гу кхы а 10 640 моттиг Iалашъе езаргйолаш хилар, уж я 48 берий беш», — аьнна чакхваьлар Бамтгире Юнус-Бек.
Медведев Дмитре белгалдир биъ мехка, цу таьрахьаца ГIалгIайче а йолаш, берий бешамашка моттигаш цатаар гIулакх чоалхане да, шерашкахьа хьаIайна хилар бахьан долаш аьнна. «Сога оалалургдац цу гIулакха жоп далдезачар шоай ханаш кхоачашъяьяц аьнна, бакъда цу тIехьа бехктокхаме хила безаш бар уж. Боккъонца хьаIайнад из. Дале а Федерацен мехкашкара массадола чоалхане хаттараш чакхдаха деза, уйла е еза из программа еррига мишта чакхйоаккхаргья Забайкале, ГIалгIайче, ДаьгIастане, Крыме», — аьлар РФ премьер-министра.
Россе вице-премьераца Голикова Татьянаца раьза хилар Медведев Дмитри цу хьоахабаьча биъ мехка эшаш йола берий бешамаш хьалъяйтара паччахьалкхенгара ахча деха деза аьлча. Цо аьнначох, хьатIадоагIача шера бахархошта хьалхашка уж декхараш чакхдаьха хила деза.

Матенаькъан Илез

№ 71-72 (12206-207), ера, 16 май, 2019 шу / четверг, 16 мая 2019 года

Добавить комментарий

Ваш e-mail не будет опубликован. Обязательные поля помечены *