Кхоанара дахар хоза хургдолаш

220 моттиг Iалашъе лаьрхIа хьалъергйола керда берий беш хургйолча цун хьалхара кхера дIаболлаш вIашагIкхетар хилар Дошлакъий-Юрта. Из керда гIишло хьалъергйолаш я 1500 дешара моттиг йолча йоккхача школа гаьна йоацаш. Укхаза тIехьагIа хьакхувргболча кагирхошта лаьрхIа дола послание оала каьхат дIадоллача дакъа лоацаш вар ГIалгIайчен Мехкда Евкурнаькъан Юнус-Бек. Керда проект кхоачашъяра болх дIаболабеча баьхка юрта бахархой даькъала бийцар цо царна цIай долча цу гIулакхаца.

Мехкдас яхачох берий беш хургья массайола оагIо теркалъяь эшача хIамангахьа бола болх тIехдика кхоачашбаь. «Хьалъяьча юкъара инфраструктура обьекташа аьттув лургба, кхыча берий бешамашкара а школашкара а хало лохъе. Нах бахаш йола микрорайонаш а дийнлургья. АргIанцара, шоллагIча сменацара гIулакх дашхарах долча РФ паччахьа амарга хьежжа керда школаш, берий бешамаш, иштта кхы эшаш йола юкъара объекташ хьалъеш боккха болх бу вай», — аьлар Евкурнаькъан Юнус-Бека.
Цо яхачох 12 эзар гаргга саг вахача Дошлакъий-Юрта из берий беш хьалйича шозза лохалургда берий бешамашкара аргIан гIулакх. Керда гIишло хургйолча капсула дIайоллаш цу юкъе лаьрххIа дакъа лоацаш цу юртара бераш дар.
Иштта Мехкада ваха хилар Аьлтий-Юрта хьалъеча 720 моттиг йолаш хургйолча школага хьажа. Школа хьаелла лерхI ер додаш дола шу чакхдоаллаш. Дешара учреждени хургйолча гIишлон го баьккха хьажачул тIехьагI, а цига къахьегаш болча болхлошца а подрядчикашца а къамаьл дир Мехкдас. Белгалъяьккхача ханаца товш ба объекте дIабодаш бола болх.
Кхоъ гIат йола школа шийна чу дешара корпуси, столовии, библиотекаи, спортивни цIаи чудоагIаш я. Из гIишло йотташ я, «Создание новых мест в общеобразовательных организациях Республики Ингушетия в соответствии с прогнозируемой потребностью и современными условиями обучения на 2016-2025 годы», яхача программа чу йоагIаш.
Мехкдас Баматгире Юнус-Бека яхачох, 8 эзар саг вахача цу юрта хIанз хьалйотташ латта керда школа болх бе йолаелча юрта дешара гIулакх аттача даргда. «Дукха ха яр укхаза дешара гIишлоши, берий беши эшаш йолга хоалу. Школа тIехдолча кхачамашца, эшарашца Iалашъяь хургья. Цунга хьежжа укх юртарча кхыча школашкара дешара низткъал дикка лохалургья», — аьнна белгалдир Евкурнаькъан Юнус-Бека.
ДIахо Магасе хьалъеш йолча ший тайпарча берий бешага хьожаш чакхваьлар Мехкда. Цига беррига болх кхоачашбаь чакхбаккха лерхI керда дешара шу долалуш.
ТIахьожама болх чакхбоаллаш Мехкдас моттигерча Iаьдала хьалхашка декхар оттадир, мехка дешараи Iилмани министерствоца дага а дайле май бетта 30 ди чакхдалале кхы эшашйола дешара гIишлош хьалъе аза моттигаш белгалъяха, аьнна. ХIаьта школаш хьалйотта лаьтташ кIезига хилар бахьан долаш цо аьлар, нахагара лаьтташ хьаийдергдолаш хIама де, цул совгIа ца доагIаше наха хьалийца лаьтташ дий а хьажа, аьнна.

И. Айюбов

№ 73 (12208), шоатта, 18 май, 2019 шу / суббота, 18 мая 2019 года

Добавить комментарий

Ваш e-mail не будет опубликован. Обязательные поля помечены *