Къаман проектех йола Россе хьалхара мехка форум дIайихьар ГIалгIай Республике

Магасе «Артис Плаза» яхача хьаьший тIаийбеча цIагIа къаман проектех йола Россе хьалхара форум дIайихьар «Национальные проекты – вектор социально-экономического развития Республики Ингушетия», аьнна цIи а йолаш. ВIашагIкхетаре дакъалоацаш бар: еррига министерстваш, ГIалгIайчен юртий, шахьарий дай, политически партей доакъашхой, зIамигача а йоккхача а бизнеса викалаш, кагирхой.

ГIалгIайчен хьал тоадарах йолча цу форуме вена дакъа лоацаш ГIалгIайчен Мехкда Евкурнаькъан Баматгире Юнус-Бек а хилар. Цига цо белгадир мехка Iаьдала хьалхашка латташ дола керттера декхараш малагIаш да.
«Форум дIаяхьарах йола уйла дагаенаяр Казане дIайихьача Госсовета кхетаче. Со кхийттав мел пайда болаш я из. Къаман проекташ – дукхача шерашка хьалха хила аьттув луш дола хIама да, къаьстта вайбар санна болча мехка. Вайна хов кхыча мехкашта хьалхашка мел тIехьадисадар вай 26 шу хьалха. Цу юкъа хьадаьраш дукха да, хIаьта лерттIа къаман проекташ кхоачашйирца, кхы а доккхагIа толаш даха аьттув ба вай кхыча мехкай юкъерча хьалаца дIанийслургдолаш», — аьнна дийцар Мехкдас Баматгире Юнус-Бека.
Евкурнаькъан Юнус-Бека белгалдаьчох, укх тайпарча форумаша, къаман проекташ кхоачашъяргахьа дакъа лацийта аьттув лургба массаболча мехка бахархошта.
«Массайола юкъара гIишлош хьалйоттаргахьа дола гIулакх кхоачашде деза нахаца бувзам лелабирца. Цу гIулакха юкъара ладувгIара вIашагIкхетараш дIакхахьа деза, 5-6 саг гулваь а доацаш моллагIйолча юртарча массаболча нахаца. Наха дакъа лаца деза массанахьа а – малагIа гIишло мичахьа хьалъе езаш я, е малагIча тайпара босс болаш хила езаш я школан фасад. Керттера дар да, лерхIаме проекташ кхоачашъеча бахархоша дакъа лацар кхетадеш нах хилар», — аьлар Мехкдас.
Уж проекташ кхоачашъяргахьа хьалхалаттачарга дехар дир ГIалгIайчен кулгалхочо моллагIа проект чакхйоаккхаш, мехка Iаьдала хьалхашка кхоачашярал совгIа, мехка бахархошта товча тайпара кхоачашъе еза уж аьнна, хIана аьлча нах ба царна юххера а кхоачашъяь чакхъяьлча мах бала безараш.
Иштта Евкурнаькъан Юнус-Бека белгалдир юртий, шахьарий дай шоай доазон тIа хьалъеш йола гIишло малагIа я, мичахьа еш я, малагIча хана чакхъяьккха яла езаш я ховш хила беза, аьнна.
Къаьстта Мехкдас терко йир, тайп-тайпарча моттигашка балха моттигаш Iалашъйирах долча гIулакха. ДукхагIа из доагIаш дар, унахцIенон, дешара, промышленни хьалаца дувзаденна.
«Хьалха ФЦП кхоачашъяргахьа, х1аьта хIанз къаман проекташ чакхъяхаргахьа, массабараш хьежаш ба керда гIишлош хьалъяргахьа. Уж объекташ болх бе йолаялале вIаштIехьа баха беза говзанчаш. Тахан из керттера хаттар да, из дашхаргахьа болх беш лаьрххIа комисси хила езаш – депутатскии, юкъараи. Вай вузашка а, юкъера дешар Iалашдеча дешара учрежденешка а паччахьалкхен заказаш хила деза, эша говзанчаш цар кийчбергболаш. Мехкарча дешараи, Iилмани министерствоца баь барт хила беза, хIаьта кадраш вIаштIехьа дахаргахьа хьалхара хила безараш муниципалитеташ я», — аьнна белгалдир Баматгире Юнус-Бека.
Цул тIехьагIа Мехкдас хоам бир, мехка гIолла йолчун тIехьа хургйолча муниципальни форумех. Ер мехка лоархIам бола форум кийчъяьй, Москве Сбербанка Университете дIайихьача федеральни форумага хьежжа, мехка проектни офисо. Цунга дакъа лоацаш бар цу гIулакхах кхеташ цунца хоттаенна министерстваши, ведомстваши, муниципалитеташи.
ВIашагIкхетаре белгалъяьха тоабаш яр мехка кхоачашъяргйолча тайп-тайпарча къаман проектех дола хаттараш дашхаргахьа вIашагIъехка. Цига проекташка белгалдаьха хаттараш дикагIдараш, эсалагIдараш малагIаш да хьожаш кхаж тассарца хоржамаш дир наха, хIара проекташ тохкаш, цар кхоачашде лерхIар фуд теркал а деш.
ХIанзле чIоагIдаь дола къаман проектай мехка паспорташ хьадийшар форуме гулбенначарна хьалхашка. ХIанзле чIоагIдаь цунгахьа эшаш дола 47 мехка паспорташ кийча да, хьаяь боарама база я, хьаяь болх беш проектни офис я, хIара къаман проекташ кхоачашъяргахьа эшашбола кулгалхой, уж кхоачашъяраш ба хержа белгалбаь.
Форуме дакъа лоацаш хинначар дика кхетаду, моллагIа тасса хIама мо а доацаш, дIахо йодача хана бахархой хьал ма хетта тоадаргахьа йола паччахьалкхен йоккха проекташ уж хилар. Цудухьа теша догдоагIа, даьд алийта а доацаш из деррига лакхача боараме цига Iунал деш болчар кхоачашдар.

Матенаькъан Илез

№ 74 (12209), шинара, 21 май, 2019 шу / вторник, 21 мая 2019 года

Добавить комментарий

Ваш e-mail не будет опубликован. Обязательные поля помечены *