Халкъашта юкъе барт бар

ГIалгIайчен Мехкда волча чуйоагIача халкъашта юкъерча гIулакхах йолча Советаца укх шера хьалхара дола вIашагIкхетар дIадихьар Мехкдас Евкурнаькъан Юнус-Бека, язду ГIалгIайчен керттерча хоамий сайто.

ДIадахача 2018 шера тоабас баьча балхах а, дIахо йодача хана мехка паччахьалкхен къаман политика тоаяргахьа малагIча оагIорахьа къахьийгача бакъахьа да а дийцар вIашагIкхетаре. Цул совгIа даьшхар, халкъашта юкъера барт барахи, мехка бахархошцарча къамаьлехи дола дош а.
Къамашта юкъе барт бари, дин тIагIолла долча гIулакхех дола хьал лерттIа, боагIача боараме хургдолаш къахьегарахи къаьстта йола проект 2025 шерага кхаччалца РФ паччахьалкхен къаман политика я, иштта «Укрепление межнациональных отношений и развитие национальной политики» яха ГIалгIайчен паччахьалкхен программа а я. ГIалгIайчен арахьарча бувзамии, къаман политикани, зарбани, хоамии министра декхараш кхоачашдеш волча Мизенаькъан Руслана яхачох 2021 шерага кхаччалца йолча хана хургдолча вIашагIкхетарех йола план хIанзале оттаяь чIоагIъяь я, ГIалгIайчен халкъий Ассамблеяс хьинаре дакъа лацар эшаш.
Евкурнаькъан Юнус-Бека Совета доакъашхой теркам тIабахийтар, цар юкъара болх лелабеча юкъарченашца, къаман культуран автономешца, Россе мехкашкарча массаза болча викалашца чIоагIбаь бувзам лелабе безаш хилар. «СНГ мехкашка, гаьнагIа доазол арахьа бахача вайчарцара болх чIоагIбе беза къаман гIулакх лорадаргахьа, иштта цигарча наха гIалгIай культура, Iадаташ дIадовзийтарца, из доацаш Россе мехкашка, доазол арахьа выставкаш презентацеш е еза», — аьлар цо.
«Оказание содействия добровольному переселению соотечественников в Республику Ингушетия» яха подпрограмма кхоачашъяргахьа дола дош а дийцар гулбенначар. Цул совгIа дийцар, ГIалгIай Мехка Российски Федерацен миграционни закон кхоачашдарах дола дош, 2020 шера Сийлахь Даьхен Даймехка тIема 75 шу дизара цIайга кийчо яр, ГIалгIайче Россех дIакхийтта 250 шу дизарах дола дош. Иштта кхыдараш а.

Матенаькъан Илез

№ 74 (12209), шинара, 21 май, 2019 шу / вторник, 21 мая 2019 года

Добавить комментарий

Ваш e-mail не будет опубликован. Обязательные поля помечены *