Лаьттан воI вар из

Укх бетта 85 шу дизад, виц ца веш, даим вай дагакхаба везача Кодзоев Гоаспой Бахьаудина. Ше мел вах, хьинаре къахьегаш, хьаьнала рузкъа мишта Iоаде деза гонахьарча наха дIахайташ, чакхваьнна саг ва из. Сона из къаьстта дика вовзар, Нохч-ГIалгIай книжни издательствос (директор Хь. Дзейтов) декхар тIадилла, цох книжка-очерк язъе, аьнна, ТIой-Юрта вахийтарах.

Юрта юкъера аьттехьа дIалестача, босагIа дагIар цун цIенош. Цигара дIахьежача, шаьра гора ахархочо леладу кхаш. Лохе бIарг ма кхоачча дIададар уж. Из вахача урамагIа дIалестача, цун ков малагIа да хетташ лела везацар. Нух, трактор, дискаш е нохараш латташ хулар даим цун наIарга.
Тахан мо дагадоагIа сона тхоаш кхашка гIолла цунца лийна. Канадера дена фу дар цо дIадувш хиннар, гIадам пхьарс мо сома хулар, цу тIа шиъ-кхоъ хьажкIа йоаллар. Iобежа шаьра маха гургболаш, оасарах хIама доацаш, цIена хулар цун кхаш. Доал дика делга дар из. Цу хьакъехьа Бахьаудина аьнна дешаш дика дагадоагIа сона: «Iа дукхагIа мел хьоаст, дукхагIа хьа новкъост хургда лаьтта. Мецвеннача сага маькх, хий дезаш санна, эшшача удобренеш йоахкаш, молхаш тохаш леладе дезаш да кхаш. Из ца дойя, дикача хьувкъамга даха дог дац».
1959 шера (укх шера 60 шу дуз из цига балха веча денз) дIаволавенна, ше лакхе аьннача тайпара къахьегаш хьавера из «Октябра 40 шу» яхача совхозе. Хьалха 200 гектар лелаяьча цо, 1986 шера 400 гектар хьажкIаш лелае соцадир. Цу шера хIара гектара тIара 95 центнер чу а ийцар. Из гIанахьа а ца байна толам бар. Цу шера елар Бахьаудина мехка эггара езагIйола цIи – Социалистически Къахьегама Турпал.
Кхы а ши шу даьлча (1988 шера) Шолжа-ГIалий тIа арадаьлар цох аз яздаь хинна «Лаьттан воI» яха дукха доккха доаца книжка. Ерригаш а 52 оагIув мара яцар цун. Из арадаккха кийчдеш, дикка къахьега дийзар редактора Шадиев Султана, художника Джансуева Иринай, кхычар. Духхьал йоазув хинна ца Iеш, сурташ а дар цу тIа. Царех цаI дар Социалистически Къахьегама шозза Турпалца Т. С. Мальцевца даьккха. Из вIашагIкхетар Бахьаудина хиннадар Москве. ШоллагIдар ТIой-Юртарча дешархошца даьккха сурт дар. Кодзоев каст-каста вехар юртарча шинна школе. ВиIий-воIаца (Башира кIаьнкаца) даьккха сурт а дар цу тIа. Къаьстта а сона хоза хетар беттагарга тIа хиннар. Цу сурта тIа Бахьаудин аьха уллача лаьттанга хьожаш вар.
Бахьаудин ваьхар 76 шера. 2010-ча шера 4 июне кхелхар турпал.

С. Арчаков.

№ 75 (12210), ера, 23 май, 2019 шу / четверг, 23 мая 2019 года

Добавить комментарий

Ваш e-mail не будет опубликован. Обязательные поля помечены *