Мехка юкъара-политически хьал дегIадаргахьа

Юкъара-экономически хьал тIехьа ГIалгIай Мохк дегIабарах дола хаттараш даьшхар Къилбаседа Кавказа гIулакхех волча РФ министра Чеботарев Сергейси ГIалгIайчен Мехкдас Евкурнаькъан Юнус-Бекеи тхьамадал а деш Магасе дIайихьача кхетаче.
Министра яхачох, Къилбаседа Кавказа федеральни округе мехка промышленностах дола хьал, айдаларгахьа дола гIулакх 2019 шера январь-март бетташка ГIалгIайче доазон тIа эггара лакхагIа да.

«Керттерча экономика дегIаярах долча гойтамаша тешал ду, ший оагIорахьа ГIалгIайчено болх дика баь хилар. 2019 шера январь-март бетташка промышленноста хьал айденнад 2,7% боарам, Россе гIолла болчул лакхагIа ба из, хьашт дале СКФО гIолла а. 2017, 2018 шерашка санна ба-кх», — аьнна дийцар Чеботарев Сергейс.
Цо яхачох январь-март бетташка мехка гIишлош йоттара гIулакх 45% лакхденнад. «Укхаза ГIалгIайче диълагIча шера хьалха я юкъерча гойтамашка Россе а, СКФО а. Гуш да из – мехка хIара шера керда гIишлош гучаювл», — белгалдир Министра.
Чеботарев Сергейс гулбенначарга хоам бир, АО «Корпорация развития Северного Кавказа» яхача юкъарчен гIонца ГIалгIай Мехка хьалхара аквапарка хьалъергйолаш хилар. Из проект чакхъяккхарца керда балха моттигаш Iалашъергйолаш болх ба из.
«КРСК таках «Сунжа» яха агрокомплекс хьайийлай вай. Иштта «Строительство парка развлечений и аквапарка» яха проект чакхъяккха лаьрхIа барт язбаьб, ГIалгIай Мехка из гIишло хургйолаш. Дика проект я из, хIама хьатIадоагIаргдолаш. Цул совгIа керда балха моттигаш а Iалашъергяь цо», — аьлар цо.
Министра белгалдаьчох, зIамига а юкъера а предпринимательства дегIакхувлара йолча Федеральни корпорацис гIо дирца, ГIалгIайчен йиъ мехка проекта новкъостал хиннад.
«Кхы а ворхI проект я юкъера ахчан боарам 4,8 млрд сом болаш, уж ерригаш вIаштIехьайоахаш я. ЦIенхашта ахча да из», — аьнна тIатехар цо ше мел дийцачоа.
Цо иштта хоам бир, РФ Минкавказа гIонца ГIалгIайченга 51,6 миллион ахча хьакхоачаргдолаш да, 2019 шера мехка Iалам лорадарах йола кхерамеча гIулакхашта духьала йола объекташ Iалашъергйолаш, аьнна.
«Iалама бувзамца хулаш долча хатарашта духьал къовсам лоаттабеш болх дIабахьа аьттув хургболаш ГIалгIай мехка 2019 шера цу тайпара объекташ кхоачашъе хьахьожадаь 51,6 миллион ахча да. Эггара боккхагIбола боарам-м бац из, хIаьта а цхьа гIа баккхарца цхьакха гIа а боаккхаш доашхаргда вай из хаттар», — аьлар Чеботарев Сергейс, дувцаш дар бердашчIоагIдара, инженерни балхашкахьа дола хьал долга белгал а деш.
Министра къаьстта белгалдаьккхар Къилбаседа Кавказа кхыдола мехкаш санна ГIалгIайче къаман а федеральни а проекташ кхоачашъяргахьа хьинаре къахьегаш йолга. «Мехкашта юкъера вай цхьана кхоачашде дезаш декхар да – Россе юкъерча боарамга кхоачаш массайолча къаман проекташкахьа Кавказе къахьега дезаш хилар. Атта дац из, амма из гIулакх вай цхьана юстардаккха дезаш да», — аьнна белгалдир Чеботарев Сергейс.
Министра яхачох, мехка халагIчарех дусашдола хаттар да энергех дола декхараш дусаш хилар.
Ший оагIорахьа Евкурнаькъан Баматгире Юнус-Бека баркал аьлар воккхача министра мехка варагI а, РФ Минкавказо деча гIо-новкъосталах а.
«Тхона массаза а хоаденнад Минкавказа гIо-новкъостал моллагIча кердача доладаларашкахьа. Школаш, берий бешамаш, культура цIенош, унахцIено лораяргахьа йола гIишлош мехка хьалйотташ министерствос хьинаре, эггара чIоагIагIа эшаш дола дакъа лаьцад. СКФО мехкашта юкъе нийсхо хургйолаш къахьега оаша, Россе паччахьа дIадехача тайпара. Къаман проектай лерхIамеча наькъех цаI да из. Таханара хьа укх мехка вар оаха тешал деш да, мехка эшачоа теркам барцеи, гIо де чам болаш хиларцеи», — аьнна дийцар Мехкдас Евкурнаькъан Юнус-Бека РФ Минкавказа кулгалхочоа баркал оалаш.

И. Айюбов

№ 75 (12210), ера, 23 май, 2019 шу / четверг, 23 мая 2019 года

Добавить комментарий

Ваш e-mail не будет опубликован. Обязательные поля помечены *