Даьхен къонгаш кхебеш

Вай республикерча Лоаман кадетски корпуса укх деношка 25 шу дизад. Ше хьайича денз, кхувш йоагIа тIехье хьаькъалца, деналца, гIулакхаца кхее гIерташ, хьаенай из, таханарча денга кхаччалца. Из кхолларах долча амара кулг яздаь хиннад 1994 шера 17 мае цу хана ГIалгIайчен президент хиннача Аушев Султана Руслана. Цу юкъа цо арахийцав Iилмаш кIоаргга Iомадаь вола 800 зIамига саг. Царех дуккхачар тайп-тайпара лостамаш долча тIема академешка дIахо дийшад тIема дешар. Дийнахьа-бус царца къахьегаш, бе-бе Iилмаш хьехаш, дикагIйола оамалаш Iомаеш ва 78 хьехархои воспитатели. Укх шера цун тхов кIалха дешаш хилар 220 саг, царех 20, из дийша чакх а яьккха, доккхагIдолча дешарашка кхайдаб.

Кадетски корпус я СурхотIе яхача юртарча Iалама хозача моттиге, цунна гонахьа я кулг тоханза хьунаш, гувнаш. Вайна массанена вовзаш волча разведчика, Сийлахь-боккхача Даьймехка тIема доакъашхочун А. Д. Цороева цIи лелаю корпусо.
Из болх бе йолаелча денз, хIанз вийттлагIа начальник ва цун. Карарча хана корпуса керте латт цун ший эггара хьалхарча выпускникех цаI хинна Дидигов Бориса Ахьмад. Цо дийшад Казанерча лакхарча командни Жукова орден лелаеча ЦIеча байракха танкови академе.
Цун дешархой болча тайп-тайпарча шерашка хьоашалгIа хиннаб инаралаш, Советски Союза а Россе а турпалаш, Iилманхой, артисташ, республикан кхыбола хьаьший. Кадеташа дакъа лаьцад дуккхача яхьашка, цхьаяраш чакхъяьннай, цар хьалхара моттигаш йоахаш.
«Укх бетта 27-ча дийнахьа, тхоай 25 шу далар дезде лаьрхIа да тхо», — йоах цун кулгалхочо А. Дидиговс.
ХIанз санна аьттув болаш хилда лоаман кадетий вахара наькъаш, моллагIча моттиге уж нийсбенна хиларах.

С. Арчаков

№ 84 (12219), шинара, 11 июнь, 2019 шу / вторник, 11 июня 2019 года

Добавить комментарий

Ваш e-mail не будет опубликован. Обязательные поля помечены *