Дий из эхь тIакхоачаш хIама?

Лоаллаш шоаш а болаш кхалнаха машен лелаяра дукха раьза боацаш а болаш а нах нийслу мехка бахархошта юкъе. Раьза боацачар оал, хьалха вай къаман хинна хIама дац из, Iадатаца товш дац кхалсага машен лелаяр, аьле. ХIаьта раьза болчар оал, кхы дIаваха мар, воша, воI ца хилча лийнаб аьнна хIама дац, шоай гIулакх ховш уж бале. Е из а, е вож а башха доацараш а ба, цу гIулакхаца бала боацаш. Дунен тIа массанахьа цхьатарра даьржад кхалнаха машенаш лелаяр.

Укхаза хаттар отт, хьалха машенаш яржале говр-ворда леладаьдий кхалнаха, аьнна. Леладеш а ца леладеш а хиннад. ЛеладирагI царна эхь тIакхоачаш хIама хиннадий? Хиннадац. ЦIагIа маIа саг воацача кхалнаха говр-ворда а, гота-мангал а леладаьд, шоай дезал а кхаьбаб. Таханара говр-ворда машен я, хIаьта гота-мангал базар я.
Машен лоаллаш хиларал совгIа машена чу, е нах дIа-хьа кхувлаш йолча юкъарча транспорта чу хьалхашка кхалсаг ягIаш хилча раьза боацараш а кIезига бац вайна юкъе. Вешта, цох дукха дош цахетараш а ба наха юкъе. Хийла водаш воагIаш аз айса зийнад юкъарча транспорта чу хьалхашкарча метте кхалсаг цаI е шиъ ягIаш. Из харца лоархIаш болча наха хоза тац, эзделаца дац оал из а. Бакъда, цхьаькха оагIо я теркал е езаш, дукхагIа юкъарча транспорта чу кхалнах шоашта ловш а ховшац машена хьалхашка дIачу. Ха йоагIа хьалхашка чуха маIа саг воацаш транспорта чу берригаш кхалнах болаш.
Хийла «Газель», «Соболь», е «Форд» машени доалахочо хьалхашкара моттигаш яьсса хилча кхалнахага оал, хьалхашка хьачуховша аьле. Йиззача рейсах шийна бизза мах хьаэцардухьа ду цо из. Цхьайола кхалсаг куст ца хеташ Iа, хьалхашка дIачу а ца ховш, цхьайола ше дIаяха сагота яр, шийга яхар а дий дIачухов. Хийла ха йоагIа, юкъарча транспорта чу духхьал кхалнах мара маIача сагах цхьа водитель мара кхы адам доацаш. Вешта дукхагIа 70-80% кхалнах ба юкъарча транспорташца лелараш, балха, така, деша.
Аз зийнаб транспорта водителаш кхалнахага хьалхашка хьачуховша, аьле уж чу а ховшийте тIаккха уж Iобайлача, эхь дац царна, хьалхашка хьачухувш уж яхаш, царех бехкаш доахаш уж бувцаш. Дукха ха я аз из хIама зийна. Тахан со «Газелаца» балха хьавоагIаш тIехьашкахьа кхы моттиг а йоацаш йисача кхалсагага сона юхе хьалхашка хьачуха аьлар водитела. Бакъда, кхача езача дIа а кхаьча из Iояьлча из ювца волавелар «Газела» доалахо. ДIахо цох бехкаш даьхар наха цо дувцар нийсадоацилга цун дIахайташ.
Дукха кхалнаьха бехк болаш а дац ала ях аз, уж хьалхашка дIачуховшаш хилар. Вешта вай фуннагIа дувце а, заманца хувцалуш доагIа гIулакх а, Iадат а, эздел а, деррига адам ше а. Бакъда, моллагIдола хувцамаш къаман оамалашца товргдолча тайпара дIа-хьа нийсде вай кара да, доагIача боараме вай къахьеге.

Матенаькъан Илез

№ 84 (12219), шинара, 11 июнь, 2019 шу / вторник, 11 июня 2019 года

Добавить комментарий

Ваш e-mail не будет опубликован. Обязательные поля помечены *