Даьца лерхIам лелабар

Юххера а хьатIадера даь лерхIам беш цун хетадаь дола ди а. Дукха тайпара дездеш денош да дерригача дунен тIа, бакъда «Международный день отца» яха ди чIоагIа кIезига лерхIам беш да Россе паччахьалкхе, хьашт дале вIалла хьоахадеш а дац из цхьаболча наха. Из ди дезду июнь бетта кхоалагIча кIирандийнахьа. Укх шера из нийслу июнь бетта 16 дийнахьа. Нагахьа санна шоаш хIанз а даьна хетадаь дола халкъаштаюкъера даь ди дезде кийчденна деце, жи дIакийчле, кхы а ха я шуга шоай даь дог хьаста а, цун самукъадаккха а.

Из ди цIай хьисапе дездергдолаш дагадехараш маIа нах а боацаш кхалнах ба. Из нийсденнад Америке ткъоалагIа бIаьшераш долалуш. Цкъа миссис Смарт яхача цхьан кхалсага наьна ди дездеча хана дагадеха хиннад шеи, ший вежарии, йижарии кхебаьр шоай да хилар. Из дагадехача нийса хиттадац цунна къаьстта белгалдаьча денца нана лоархIаш, хIаьта да цалоархIаш хилар. ТIаккха мехка Iаьдалга цо дехардаь, цар из къоабала а даь ишта юкъедаьннад из ди. ТIехьагIо кхыча паччахьалкхенаша а из дездеш иштта халкъашта юкъера даь ди хьахиннад цох. Ший даьна совг1ата миссис Смарта хьармакх денна хиннад, из зиза санна къаьга хилда хьа вахар аьнна ловца баккхарца.
Европеи, Америкеи санна айдаь лоархIаш дездеш дац из ди Россе, бакъда цхьаболчар цу дийнахьа шоай даьна совгIаташ ийдеш, цун дог хьоасташ, из раьзавеш вIашагIкхетараш дIакхухь. Амма гIалгIашта юкъе вIалла бий-хьогI аьнна а хеталу из ди теркал деш нах. Вешта вайна динга диллача а, къаман Iадатага диллача а хIараненна декхар долаш да ший да лархIар, цун сий дар, цунца кIаьда, Iимерза хилар. Дукха нийслу нана хьоайича да хьоа ца веш.
Наьна санна лерхIам бе безаш ва да а. Ший да везаш, цун сий деш саг ца хуле наха а лоархIаргвац из. Цул совгIа ший даь сий цадер наха а, Далла а везаргвац. Даьца эхь, эздел, сабар хила деза массахана. Даь юхь е еза, цо мел яхар кхоачашдеш. Дас цхьа моллагIа хIама хаьттача, сабарца жоп дала деза, корзагIваьнна а воацаш. Да хьачуваьлча ураэтта магIа баьчче дикагIа йола моттиг дIаяла еза цунна. Да волча цIагIа аркъалъухаш белаш хилац дезал. Ший дас къамаьл деча хана, юкъе лелхаш, шийдар дувцаш хила йиш яц дезалхо. Дас шийна даь хьехар дIаэцаш хила веза, хIана аьлча ший дезалхочоа дас во хьехар дергдац, воча новкъа воаккхаргвац, дика дар мара аргдац цо цунга. Из кхета а деш цо мел яхачунга ладувгIаш из кхоачашдеш хила веза моллагIа дезалхо.
Ший даьга ла ца дувгIачоа ше малув ховргдац, ший дай малаш ба ховргдац, ший гаргалол йовзаргьяц, кхычоа дIахьеха ховргдац, ше Iомадаьр, шийна ховр мара тIехьенна дIахьеха йиш яц. Эхь-эздел, хьаькъал, сабар, денал, яхь, вай даьгара Iомаду вай, цун оамал гIулакх, вайца даха дус. Нахаца Iимерза хилар, гаргалол лерхIар, дика-во нахаца декъар, лоалахошка, юртахошка, мехкахошка во деча оарцагIвалар, деха веначоа шийга дар кхо ца деш дIадалар, цамогаш метта уллачунга хьажа вахар, хьаьнала къахьегаш дезал кхабар, царна дика хьехар деш дезал кхебар – из деррига даьгара Iомаду вай.
Ший дезал геттара дукха безаш, уж кхаба гIерташ царна напагIа Iалашдеш хул да. Дас къахьег, царга дешийта гIерташ, царна болх хилар догдоахаш, царех нах бе гIерташ, цар вахар даькъала хилар догдоахаш. ХIаьта дезал из шедар дика кхетадеш хила беза. Цу массадолчун духьал баркал ала деза даьна. Даьца лерхIам боацаш хиннача сага гIулакх къемата дийнахьа дика хургдац, йоах бусалбаша.
Ираз долаш маьрша бахалба вай дай.

Матенаькъан Илез

№ 85-86 (12220-221), шоатта, 15 июнь, 2019 шу / суббота, 15 июня 2019 года

Добавить комментарий

Ваш e-mail не будет опубликован. Обязательные поля помечены *