Низъоамала даькъе дунен рекордашта юкъе хьалхара моттигаш яхар

Отжиманеш йирца дунен шиъ рекорд яьккхай ГIалгIай Мехка вахархочо 6 шу даьннача Льянанаькъан ИбрахIима. Ала деза ИбрахIим «Чингиз» яхача спортивни клубас кхевеш хилар.

Ханага диллачача 2 сахьата – 3720 отжимании, дукхала боарамга диллача цкъа дIаэтта кхы тIера ца воалаш – 4445 отжимании яьй зIамигача низъоамалхочо. Россе рекордай книжкан «Фитнес» даькъе керттера говзанча вола Лобков Андрей ва ИбрахIима рекордаш овттаяь хиларах дола тешал дIаяздаьр. Отжиманеш йирца рекордаш овттаяра гIулакх Магасерча Барта гIала чу дIадихьар.
Хана зIамига вале а тIехйола дунен рекордаш яьха Льянанаькъан ИбрахIим ше волча тIаийца цунца вIашагIкхетар дIадихьар ГIалгIайчен Мехкдас Евкурнаькъан Баматгире Юнус-Бека. Низъоамалхочун рекордаш зIамагIчар меттел боккхагIчар а доаккхалде дезаш я аьнна дийцар Мехкдас.
«Хьона тарабала, хьога кхача гIерташ къахьегаш зIамагIбараш хиларал совгIа боккхагIбараш а хила беза. Низъоамала даькъе хье дика кийчвенна хилари, котталонга кхача хьай низ хилари хьагойтад Iа. Хьа боккха аьттув балар лов сона, хIаьта тхо массаза а хьа оагIо хьаллаца кийча хургда», — аьлар Мехкдас зIамигача низъоамалхочоа совгIаташ дIалуш.
Кердача Редантера зIамига вахархо цу толамга кхоачаргволаш из Iомавеш цун новкъост хиннар цун да Тимур ва. Белгалде деза Льянанаькъан Тимур дукха хана денз спортаца чам болаш къахьегаш хьавоагIаш, цул совгIа полицейски болх беш хинна хилар. Цо яхачох ший пхи шу даьлчахой кIира ялхазза тренировкаш еш къахьегаш ва ИбрахIим.

И.Айюбов

№ 85-86 (12220-221), шоатта, 15 июнь, 2019 шу / суббота, 15 июня 2019 года

Добавить комментарий

Ваш e-mail не будет опубликован. Обязательные поля помечены *