Дийнахьа мукъагIа дIайоае шоай лампаш

ТIехьарча шерашка дукха дийцад вай мехка нахеи, Iаьдалеи-юкъареи организацеши бала боагIача боараме шоаш йоагаеча электроэнергех мах дIалуц яхаш. Геттара дукха дийцад из дош, шоаш пайда эцача хIамах мах дIабала безаш хиларагI нах дIакхетабе гIерташ телевидене а, радио а, газеташка а, кхы дIахо интернета тоабашка а. Из доацаш, бусалба Iилма дийшача наха а дувц, зехьа хIама доадар къа долаш хилар а, ше пайда эцача наьха хIамах сага мах дIабала безаш хилар а. Бакъда цох кхетараш а цакхетараш а ба.

«МРСК», «Ингушэнерго» яхача юкъарченаша бахача наха наIарга а ухаш, организацешка а дIаухаш дукха болх баьб, хIанз а даггара из болх беш ба токах доагIар дIадаларах дола гIулакх меттаоттаде гIерташ, цу наькъашца наьха кхетам шербе, лакхабе гIерташ. Из мел дола хIама чакхдаьлча цхьаболчар дIалу шоашкара доагIа ахча, цхьабараш ханахьа луц из, е вIалла ца луш Iа, дукха сагота боацаш. Цул халагIа да цхьаька гIулакх.
Хийла нах хул, шоай электроэнерги эсала я, цунга хьежжа телевизор, е холодильник хьалалотае аьттув хилац шоай яхаш, кадаш. Бакъда шоашка яр лора ца еш, шоай вахар тIа мел йола лампаш – нах чу болча а боацача а – хьал а саге уж дIа а ца йоаеш Iеш хул цхьабараш. Iуйранна балха водача хана новкъа ваьнна лелаш хиларагI дукха хIама зе аьттув хул са. БархI-ийс сахьат даьлча а йоагаш хул цхьаболча наьха коашкара, коанаIарашкара, улицашкара лампаш. Цхьаволчун коа делкъийга а йоагаш хул лампа, йоайинза. Цкъа-дале хIама зехьа доадар да из, шозлагIа-дале Iаьдала а е адамашта а сагота цахилар да.
Цу йоагаеча электроэнергех мел ханнахьа ахча дIалуш вале а, хIаманна сагота воацаш хила йиш яц саг. Ток, хий, газ, зехьа доадеча сагах Дала шийна хьаденнача ниIмата хам беш вац ца аьлча кхы фу аргда? Даьлера салот-салам хилда цунна, вай Элчано аьннад: «Хи юхе вахе а зехьа хий ма доаде», аьнна.
Мегаргдац хIама зехьа доаде.

И. Айюбов

№ 88-89 (12223-224), ера, 20 июнь, 2019 шу / четверг, 20 июня 2019 года

Добавить комментарий

Ваш e-mail не будет опубликован. Обязательные поля помечены *