Моллаш башха кхайкара хьаькъе

ДIадахача шера НТРК «ГIалгIайче» хиннача «Халкъацара къамаьл» яхача ГIалгIайчен Мехкдаь Евкуранаькъан Баматгире Юнус-Бека аргIанарча вIашагIкхетаре, наха ийдеш хиннача хаттарашта юкъе дар ГIалгIай Мехка ламаза кхайкаш бола моллаш, (азан дар) тайп-тайпарча ханашкахьа хIана нийслу, зIамига мохк а ма бий ер, цхьа ха Iооттае мегаций вай мехка бахархошта ламаза ханаш белгала а яь, аьнна из дехар деш. Цу хана «Сердало» газета номера тIа кепа а техаяр цу хьаькъе дош дувцаш мехка бусалбаша из хаттар юстарадаккхар ловш.

Из хаттар оттадаьча сагах бехкбоаккхалга дац, хIана аьлча хIанз а вай мехка цхьан юрта шин-кхаь тайпара бекъабенна кхайкаш моллаш ба. Царех цхьаболчар мехка бахархой кегабу, шоаша малагIа молла кхайкача ламаз дергда, маца марха доастаргда ца ховш. Из дувзаденна да, белгалъяь ламаза ханаш шоайла хувцам болаш хилар бахьан долаш.
Мехкдас Евкуранаькъан Юнус-Бека хьаллаьцар вай мехка ламаза моллаш кхайкара гIулакх цхьан хана чухьа хила дезаш хилар а, из ха дIачIоагIъе езаш хилар а. «Из хаттар цкъа айдаь Iийна дац. Оаха дукхаза дийцад из бусалба дина хьаьке долча хаттарашкахьа волча са дагвалархочунца. Цхьан хана Бусалбай дина юкъарчено цу тайпара ха оттаяьяр, цул тIехьагIа нах башхабайна гIулакх нийсденнад цига. Вайцига кхычахьара тIабаьхкача хьаьшашта хьалхашка а тоам ца хеташ хул, мимараш тIара 5-10 минот башхало йолаш азан хьахезача. Ишта хила йиш яц», — аьнна белгалдаьдар из гIулакх цу хана Баматгире Юнус-Бека.
Массехк шу да ишта башхало йолаш моллаш вай мехка кхайкаш бола. Цхьабараш хьалха кхайкача моллаца шоай ламаз дий а доастачо марха даьсте а паргIатбовл, хIаьта тIехьа кхайкача моллашца мара из деш боацараш кхы а 10-12 минота хьежа безаш хул. Из хаттар оаха тIадихьар ГIалгIайчен Мехкадаь дингахьа долча хаттарех гIонча-дагавалархо волча Дзовранаькъан Мухьмада:
«Из хаттар хIанз а къахьегаш доашхаш да, цу тIехьа болх беш цу гIулакхах лерттIа кхеташ дийша кагий нах ба. ДукхагIа цу ханашкахьа башхало яраш Iуйра ламазаи, маьркIижа ламазаи ханаш я. Кхы дIахо долча масса ламазашкахьа а цхьа юккъера боарам болаш ха вай хургйолаш, хьалха дIабахача вай Iалам наха овттаяь хинна ханаш а, тахан тхоашта гушдолчунца хьаховш йола ханаш а, карарча хана вай ламаз деш йола ханаш а – уж ерригаш тахка царца массане хьинаре болх а баь, тIаккха мара из халкъа арайоаккхаргйоацаш къахьегаш да тхо. ХIанз тхо долчарел совгIа кхы а шоаш хьакхийтта мехка юкъера кагий нах ба тхоца из болх беш, оаха раьза долаш уж тхошца хьа а кхетийт. Цул совгIа, къаьстта укх гIулакха хьинаре къахьегаш бараш Мехкда волча чуйоагIаш йолча дина гIулакхех йолча урхале болхбеш бола кагий нах ба. ХIанз тхоашка кийча йолаш йоа ха наха хьаяь аьлча а дIалуц оаха, ма хетта из болх чакхбаллалца сабардеш, цхьакха кхыча хана кхайкаш моллай тоаба яржар кхераш. Дала аьннадале кхы дукха гаьна ца доаккхаш из гIулакх чакхдаккха уйла йолаш да тхо вай мехкарча юрташка цхьан хана чухьа ламаза кхайкаш ха хургйолаш», — йоах Дзоврнаькъан Мухьмада.
Тешаш хургда вай, дIахо йодача хана хьалхеи тIехьеи башхало йолаш вай моллаш кхайкаш хург цахиларагI. Къаьстта боккхийча наха хала да из гIулакх, хIана аьлча моллагIа шоаш хьадеш дола хIама хьалха а доацаш, е тIехьа а доацаш, цIенна, дизза кхоачашде гIерташ хул къоаной. ХIаьта цу ханех фу хул а, из гIулакх мишта къасташ да а хьожаш хургда тхо, дешаш хилалаш «Сердало».

Матенаькъан Илез

№ 90-91 (12225-226), шоатта, 22 июнь, 2019 шу / суббота, 22 июня 2019 года

Добавить комментарий

Ваш e-mail не будет опубликован. Обязательные поля помечены *