Вай воаш деций бехке?

Вай берригача мехка а, мехкал арахьа а бага яхай дукха ха йоацаш зIамигача йиIигаца цун даь-йишас лелаяь къизал.

Дукхачар хаттараш ду укх деношка: ай лоалахошта, гаргалча наха бIаргацагуш хиннад цу йиIига хьал? ДIа хIана аьннадац цар Iаьдалга, оарц хIана даьккхадац?
Сона хетачох, иштта яхараш ба вай къам ца довзараш, е вай оамалаш йовза безам боацараш.
Харц хIама деш вола саг бIаргавайча, тийшаболх беш воал е тийшаболх баь саг хоавалча, цунах хоам бе йиш яц вай яздаь доацача низамах, Iадатах.
Изза мо хIама бIаргадайча, харц хIама деш воал саг соцаве йиш яц хьа, е цунах бехк баккха а йиш яц. Iаьдалга дихьача-м из оакхал ма лоархIий.
Харц ваьнна саг хьайна бIаргавайча, цун кулг цу хана Iа хьалаьцадале а, цун даьга е наьнага хIама ала йиш яц хьа. «Тха воI, тха йоI яц из», «аз яьча йоIо изза мо хIама дергдац, — аргда хьога цун дас-нанас. Нана ший виIий-йиIий гадаккха отте, цун мара, ший кара хIамадоацилга ховш, цу сесага яхачоа тIехьа этта, хьох лата волалургва.
Дукха да иззамо хIаман масалаш.
Дукха ха йоацаш новкъа воагIаш байра сона сайца латташ нускал доаладеш боагIа замеш. Боккхийбараш, мехкари, кагий нах Iо а баьнна машенашта тIера латташ бар. Хетаргах нейций кIопилга чура кагий хIамаш екъаш хила безар уж.
Цхьа зIамига саг дуккха машен кхестаеш вар. Дешашца аьнна варгвоацаш хIамаш дар цо цига леладаьр. Массехк минота ший машен кхестайир цо наькъа юкъе. ЦIувзаш чархаш яр, тIехьагIа пайдана хургйоацача бесса, етташ сигнал яр, шой гIулакха дIа-хьа болхача наьха машенаш сувца е езаш хилар, хIана аьлча цун юхе гIолла дIатIехвала кхераме дар.
Цо леладу хьама телефона хьатIадоаккхаш цун новкъост латтар юстара а ваьнна. Из бIаргагуш шоай къамаьл дувцаш латташ вожаш а бар. Шийна кIордадича,машена чархаш кхы дIахо пайдана йоацача яха, зIамига саг сецар.
Уйла хиннаяьр са машена номер дIаязъяь Iаьдалга хоам бе. Цхьабакъда данзар пайда бала хIама доацандаь. Дас-нанас цун га доаккхаргдар, тайпан боккхий нах наIарга боагIаргбар.
Тахан гаргала боацача нахага-м хIаьта а яц цар леладеча харц гIулакхах хIама ала йиш. Хьай веший-йиший дезалах а ала йиш яц во хIама, цар даьд аьнна белгалдаккха, уж совцабе гIорта везац. Цар нанас хьона из дутаргдац, вош хьох лотавергва. ДукхагIбараш ба аз бувцараш. ХIанз дукхача дай дац кара ший воIах-йоIах царех ца товш хьама ала. Цар нана ший берий га даккха отт.
Тайпан сага тахан карадац ший тайпана харц ваьннача сагах во дар ала, цо фуннагIа дой а.
Кхыча паччахьалкхе бахача вай мехкахош зийнад лоалахочун цIагIара бер делхаш хезача полице хоам бу моллагIча сага. ТIаккха полице декхарала я из гIулакх тахка а да-нана бехктокхаме овттабе а. Хоам баьчунга хIама а аргдац, баркал ца оале. Вайцига ишта дац.
МоллагIа во хIама деш саг воале а, цо дечох зе хургдале а саг вувш, саг лозавеш, наха бала бахьаш,- цунга хIама ала йиш яц вай IаьдалагI. Бехке хьо а волаш дусаргда хьа гIулакх.
Вай юххьанца дувца доаладаь хIама дагадехача, нагахьа санна цу йиIига хьал довзаш волча сага хоам бича, юха фу хозаргдар оарц даьккхачоа? «Хьа гIулакх дац!», «Тхох фу ала воал хьо?», «Iайха аьннача хIама кIалъотта веза хьо!» Иштта хургда цун хозаргдар. КъайлагIа алар пайдана мичад, хIана аьлча, цу тайпара хIаманца Iаьдало бехке вергвац харцвар. Тешал де деза хьай цIи а йоаккхаш.
Цудухьа вай воаш уж Iовдала зене къаьна хIамаш юкъера дIа ца доахе ишшта зуламе ийрча хоамаш дIахо а хозаргда вайна а, кхыча мехка бахачарна а. Дезаш дий вайна из?

Н. Бескалиев

№ 101-102 (12236-237), ера, 11 июль, 2019 шу / четверг, 11 июля 2019 года

Добавить комментарий

Ваш e-mail не будет опубликован. Обязательные поля помечены *