Оаша йийнайий коартол дIа?

«Лаьттах дIатоIаяьр хьатIаяланза Iац», оал вай боккхийча наха. Бакъда из. Со се цу хIаман теш а хиннав хIара шера. Бешамаш дIа а ювш къахьегача наха дика ховргда аз фу ях.

Сона дага а доагIаш цхьа шу дIадахийтадац оаха, дIайийча хIама хьатIаяллал дола лаьтта дIа ца дувш. ХIана аьлча, из гIулакх массаза шиш болаш леладаьд тха дас, нанас. Цар мегийтадац тхона даьсса лаьтта уладар.
Укх шера сай беш аз дIайийнача хана цхьаболча наха йоахар сога, «…балха а волаш маца кхоавергва хьо из лелае, хIанз моллагIа хIама хьаэца йиш йолаш массанахьа йолаш ма йий. Йоаергья Iа из беш! Эрна къахьегам хургба хьа цох».
Шийна къа а хьегаш хIама хьа а деш вахача сага из кхоачашде ха кораергьяц аьлча бакъдац. Лоадам боацача гIулакхашта йоаеш йола хаи, кIезига низи дIатIадахийта мара эшац цу гIулакха. Цул совгIа цIен дезал хIама хьаде Iомабара дика массал а да из.
Малх цIара баьлча яа йолаяьй наха, шоаш дIайиначар керда коартолаш. Дала беркат долда массанена а, укх шера хьагучох масса тайпара хIама дика хьийкъад, доалдаьчарна хIаьта а. Белаца гув хьахоарцабича, Iаьржача лаьтта юкъера бос лепа коартолаш хьакъадача хоза-м хет, къахьегаш отте а. БIарг сийрдабаккхарал совгIа, цIена кхача ба из.
БIаьсти хьаяьннача хана наха бешамаш дIаер догдоахаш массехка статья кепатехаяр оаха «Сердало» газете. Къаьстта, «лаьтта дукха деза тхона» яхача наха из дIадер догдоахаш, царна лаьрхIа а дийцадар оаха цхьадараш. Бакъда, наха бешамаш кIезига йийнай дIа. Хийлане лаьтташ гонахьа карташ а йоацаш, йоархIаш тIа а яьнна дадаш да. Дала шийна беннача аьттон хам цабар да ца аьлча кхы фу аргда цу гIулакхах?
Лаьттаца къа ца хьегачарна айс хетаяь стихотворени йоалаергья аз дIахо.

Техкадий Iа лаьтта?

Алал сога, техкадий Iа лаьтта?
Сигала урагIа хьийжавий?
ДIайхача денна виза хьацарах тIаьда,
Беша цел Iа бийттабий?

Хедаяьйий Iа харца баьцаш,
Хьувкъаргдолаш хьай ялат?
ДIайхача дийнахьа фе Iимад йоацаш,
Ваьллавий хьо мелаш шийла кад?

Е таккхалча лаьтта чу а лаьца,
ВаьгIав хьо, из дIа ца дувш?
Дийнатий багара сискал яьккха,
Докъадаьд Iа хьаьна лаьтта тувж?

Хьона бовзац, «къонах», лаьттан мах.
Iа цун цIаккха хам бергбац.
Дезац хьона наха дахар лаьтта нух,
Аз дувцар хьона эшаш дац!

Ма хьаьна да-кх лаьтта. Iа шийга цхьа фийг дIакховдабича массехказа из сов а баьккхе, доккха беркат юхакхоавдаду цо. ЦIаккха кхоачалургдоаца вахар да лаьтта. Вай дай кица да: «Шийга долчох кхоачам цабаьр долчох ваьннав» е «Шийга долчунна хам цабаьр долчох ваьнннав» яхаш. Дала шийга хьакхачийтача лаьтта ше хам мишта бу, ший дега чу Iочухьежача хIара сага шийна ховргда.
Ма дезалда вай лаьттах хьега!

Матенаькъан Илез

№ 101-102 (12236-237), ера, 11 июль, 2019 шу / четверг, 11 июля 2019 года

Добавить комментарий

Ваш e-mail не будет опубликован. Обязательные поля помечены *