Метта чурт оттаде деза ха гаьна яц

ТIехьарча шерашка дукха берий бешамаш хьалъяьй вай мехка. Хьалха районе цаI е шиъ мара ца хинна уж хIанз хIара юрта йолаш я. Далла хоастам ба бераш шахьаре дIакхувла ца дезаш. Юрта шоай бераш дIакхувла аьттув ба хIанз ноаной. Царех хийла гIишло тIехболча кхоачамца Iалашъяь а, архитектура хоза йолаш а, коа-карта дика лостам болаш а я. Бакъда, теркалде доагIа цхьаькха дакъа.

Вай мехкарча берий бешамех а цхьайолча школан библиотекех а гIалгIай меттал мишта аргдар, таржам де тхона цун цIерах яхаш дехараш деш хала кхест цхьабола гIалгIай. Таржам де а цу дехара жоп дала а хала дац, бакъда, эрсий метта тIара гIалгIай метта тIа из гIулакх даккха велча вIашкадоагIаш хилац хийладар. Метта кхетама уйлаш тайп-тайпара хилар да из. Эрсий меттал дар гIалгIай меттаца, гIалгIай меттал дар эрсий меттаца ца товш нийслу.
Масала, «Непоседы» яхаш керда хьалъяь берий беш я вай мехка цхьан юрта. Цу чура болхлой геттара сутара бийрза из гIалгIай меттал из хилча бакъахьа хеташ цун таржам деш ба. Эрсий метта тIара хьа таржам дича «Сатембоацараш» аьнна дергда цу деша таржам, амма из гIалгIай меттал дика товш дац. ХIана аьлча сатем боацача сага вахар хала да, вайна сатембараш эш. «Ма сатем боацаш саг ва-кх хьо» оал вай сагота хьувзача сага дукха раьза доацаш хилча. Эрсий меттал из дош, (непоседы) товш дале а вай меттагахьа астагIа да из. Цхьаькха цхьа цIи я «Маленький гений» яхаш, (ер библиотека я). Уж а хьайзаб цун цIи таржам дирца гIалгIай меттал яккха. Цун гIалгIай меттал таржам де велча саг кегавенна вусаргва. Гений? Малав из? Эрсий-гIалгIай дошлорга тIа латт цун таржам, тIехьдаьнна хьаькъал дола саг, аьнна яздаь. ТIаккха долча тайпара цун таржам де велча, дIауйла ергья-кх оаша вайга фу хьал хургда.
Уж халонаш хургйоацаш, е корта лазабаьккха лелавезаргвоацаш нийсде йиш йолаш да из гIулакх. Юххьанца берий бешах цIи туллача хана гIалгIай меттал из цIи дIа а енна, тIаккха цун эрсий меттал таржам доре геттара атта хургдар. Хоржаше гIалгIай а эрсий а шинна меттал товргйолаш бе беза цу тулача цIера хоржам. ТIаккха сов хала хургдацар из дош къоастаде. МоллагIа хьадагадехар хьадаьд аьнна доалаш дац. Хила доагIача тайпара хьадаь хIама атта да. Из ишта хилара деррига бахьан фуд аьлча, метта саг сагота цахилар да.
Хьагучох метта чурт оттаде деза ха гаьна яц.

И. Айюбов

№ 103-104 (12238-239), шоатта, 13 июль, 2019 шу / суббота, 13 июля 2019 года

Добавить комментарий

Ваш e-mail не будет опубликован. Обязательные поля помечены *