Бошта тхов-кийле Iалашярдухьа

Укх деношка, ГIалгIайчен Правительства тхьамадас Йовлой Зялимхана тIадилларца да-нана доацаш дисача бойи, даьи-наьнеи доал доацаш дисача берийи спискаш тIа латтачарца вIашагIкхетар дIадихьар дешараи, Iилмани министерстве. Укхаза гулбеннараш долчох дIакхетабеш вIашагIкхетар дIахьош хиннараш дешараи, Iилмани министр Къоастой Юсупи, дешараи, Iилмани министра гIонча йола Угурчнаькъан ПятIамати, адамий бокъо лораерах вола мехка викал Оздой Джамбулати, Тайпай совета доакъашхо Арсмакнаькъан Ахьмади бар.

Гулбенначарга къамаьл деш министра белгалдир, йоагIачарна квартира хьакхоачаргйолаш хIара шера ГIалгIай Мехка дешараи, Iилмани министерствос барт язбу РФ просвещени министерствоца, цу гIулакха лаьрхIа федеральни ахча хьахьожадергдолаш.
«Оаха кхетаду, шох дукхадараш квартирех ахча а телаш дахилга, цхьабараш шоай гаргарча нахаца бах. Цудухьа де йиш мел яр хьадеш да тхо, ма хулла сихагIа шоана законах йоагIаш йолча квартирай доалахой шох хургдолаш», — аьнна дийцар Къоастой Юсупа.
Гулбеннарий дукхагIа хинна хаттараш дувзаденна дар квартираш хьакхачара ханах лаьца. Цул совгIа сагота бар уж дукха хана денз да-нана доацаш дисача бойи, даьи-наьнеи доал доацаш дисача берийи спискаш тIа латтар мара хIанз а квартира хьакхаьча хIама дац шоашта яхаш. Министра гIонча йолча Угурчнаькъан ПятIамата белгалдир, 2015 – 2018 шерашка федеральни бюджета тIарча ахчан гIонца мехка 424 сага вахар Iалаш даьлга.
«Укх шера оаха лерхI 68 бой долча берашта социальни вахар Iалашде. Финансови кхоачам хIанзле хьакхаьча болаш ба», — аьнна белгалдир цо.
Сага бокъо лораерах волча викала Оздой Джамбулата яхачох, дукхагIа гIалат дола моттигаш нийслуш я, боагIача боараме нахага учете дIаовтта а шоай аргIа хьалхататта а хоам цахилар бахьан долаш. Цо иштта белгалдир, спискаш тIа латтача мехка бахархой бокъо йохаяьйоацилга а, царех хIараненна шоай аргIанга хьежжа бокъонах долча тайпара квартира дIакхоачаргхилар а.
2019 шера январь бетта 1 дийнахьа баьча оттамах вахара Iалашон эшаш бола мехка бахархой 906 саг ва. Бойлахь дисача берашта тхов-кIиле Iалашъяра гIулакх доашхаш да «Об обеспечении жилыми помещениями детей-сирот и детей, оставшихся без попечения родителей» яхача ГIалгIай Мехка законаца.

АЙюбов И.

№ 106 (12241), ера, 18 июль, 2019 шу / четверг, 18 июля 2019 года

Добавить комментарий

Ваш e-mail не будет опубликован. Обязательные поля помечены *