ГIалгIай Мехка берашта гIо дирах йола къаьстта фонд хьаелла лерхI

Укх деношка, Россе паччахьа волча чуйоагIача берий бокъо лораерах йолча викалца Кузнецова Аннайца вIашагIкхетар дIадихьар хана ГIалгIайчен Мехкдаь декхараш кхоачашдеш волча Калиматнаькъан Махьмуд-Iаьлас. Мехкдас дийцар, берашта гIо дирах йола фонд мехка хьакхолла шийна дагадохарагI а, ше из хьаелла лаьрхIа хиларагI а.

«Аз лаьрхIад мехка берашта лаьрхIа йола фонд хьаелла. Из мишта хургья хIанзе а белгалдаьнна дац», — аьнна дийцар Мехкдас.
Цу тайпара фонд геттара дика хургья аьнна хеташ, цун раьза йолаш тIаийцар из гIулакх Кузнецова Аннас. Цо яхачох цу тайпара фонд хилар доккха гIо да дезала а бера а, иштта кхыдолча дукхача бахьанашта а эшаш я из. МоллагIа къовсам тIехьа е тарон тIехьа долча гIулакхашца дувзаденна хаттараш дукха хул дезале, цхьа да оарцагIа вала везаш.
«Укхаза фондо, керттера гIо де тарлу. Из эшам болаш ба. Дика гIулакх хила йиш йолаш да цох, бералгахьа дола хаттараш дашхаргахьа. Вай кхетаду из мел чIоагIа эшаш хIама да», — аьнна белгалдир берий бокъо лораерах йолча викала.
Даь-йишас етташ лелаяь хинна Ажиганаькъан Айша йолча Москве больнице ше хинналга а, цун гIулакх ди тIехьа меттадоагIаш хилар а дийцар ГIалгIайчен Мехкдас паччахьалкхен берий бокъо лораерах йолча керттерча викалга.
«Боккъонца цу йиIига дикадар хилча бакъахьа хеташ из лораеш вIашагIбетталуш ба нах. Цун тIа мел кхаьчача балех, халонех из яккха вай вIаштIехьа даргда аьнна хета сона», — аьлар Кузнецова Аннас.
ДIахо цо дийцар 2019 шера бIаьсти ГIалгIай Мехка ше хиннача хана, шийна цига геттара хоза а маьрша а хийттар аьнна.

Матенаькъан Илез

№ 107 (12242), шоатта, 20 июль, 2019 шу / суббота, 20 июля 2019 года

Добавить комментарий

Ваш e-mail не будет опубликован. Обязательные поля помечены *