Нах могаш хилча бакъахьа хеташ

Июнь бетта 19 дийнахьа Наьсарен керттерча маьждиге рузба де баьхкача наьха могашал тохкаш, тайп-тайпара лазараш долча наха цхьацца хоам тIабола каьхаташ дIа-хьа декъаш, цар давлени юсташ «Диспансеризация в 2019 году» яха акци яр мехкарча лораша дIахьош. Укхаза дакъалоацаш из дIахьош хиннараш ГIалгIайчен унахцIенон министерствона ларца ГБУ «Республиканский центр медицинской профилактики» яха мехка больница юкъарче яр.

«Хийла саг ва шийна лазар дий а ца ховш могаш воацаш лелаш. Цхьавола саг ший корта лазабаьлча а, е дегI лазадаьлча а из дукха теркал ца деш, е фу бахьан долаш да из ца тохкаш лелаш хул. Цудухьа цу тайпарча нахага хоам бар духьа лелабу оаха ер болх. Диспансеризаци ю 3 шера цкъа 18 шерагара 39 шерага кхаччалца ха мел йолча Россе бахархошта. ХIара шера ю 40 шерал лакхагIа ха йолчарнеи, цхьацца гучадаьнна лазараш долчарнеи. Шийна моге а ца моге а больнице дIа а ваха шийна фуд хайча бакъахьа ва саг, могаш вале геттара дика а ма дий цунна», — йоах акци дIахьош болча лораша.
Цхьаболча наха шоашка лораша хьаяхар дукха теркал ца деш тассе дут. Цу тайпарабараш кIезига бацар маьждиге баьхкачарна юкъе. Хийлавар кулг тассе, е доастама хеташ тIехвоалар лораш дувцачунга ла ца дувгIаш, бакъда лазаро дIалоаце, метта дукха кIалтIавувла везаргва хийла даь. Лораша бена хоам тохкаш царга ладувгIараш а бацар Даьла параз дIадала баьхкачарна юкъе.
«ЦIаккха давлени яха хIама фуй ховш хинна вац со. ТIехьара цхьа иттех ди да со дог дола моттиг лазаш лела, корта а ба цхьа кIезига бIогора баьлча мо. ХIанз акхар Iохоаваь давлени йистай са, хьалха 120/80 хинна из тахан 180/100 я йоах. Кхы юкъ ца йоаккхаш юрта амбулаторе дIа а вахе хьай гIулакхага хьажа аьннад сога акхар. Дала аьннадале из кхоачаш де хьожаргва со», — аьнна дийцар маьждиге венача цхьане.
Акци дIахьош болча лораш яхачох, нах хила тарлуча лазарех кIалхара бовла йиш йолаш ба, нагахьа санна шоай ханнахьа цар дарба дой, у — лазар доагIача тайпара юхатохе.

И. Айюбов

№ 107 (12242), шоатта, 20 июль, 2019 шу / суббота, 20 июля 2019 года

Добавить комментарий

Ваш e-mail не будет опубликован. Обязательные поля помечены *