Къаман проекташ кхоачашъяргахьа бехктокхаме Правительствои муниципалитеташи хургья

Хана ГIалгIайчен Мехкдаь декхараш кхоачашдеш волча Калиматанаькъан Махьмуд-Iаьлас тхьамадал а деш вIашагIкхетар дIадихьар Магасе къаман проектех лаьца. Укхаза гулбенна мехка Правительства а районашкара а хьакимашка къаман проекташ кхоачашъяргахьа бехктокхаме а хила, шоай болх боагIача боараме кхоачашбеш къа а хьега а аьнна, къамаьл дир Мехкдас. Вай хьегача къига хьажжа мара хургьяц вай чаккхе, цунга хьежжа да мехка бахархой хьал тоадалара гIулакх, аьнна дийцар цо. Цул совгIа Макшарипа Махьмуд-1аьлас белгалдир из хаттар дашхаргахьа Россе кхыча мехкашта нийса дIаотта еза ГIалгIайче а, аьнна.

Къаман проекташ кхоачашъяргахьа хиннача вIашагIкхетаре дакъа лоацаш бар: Правительства вице-премьераш Латырнаькъан Исроапал, ГIазднаькъан Марет, проектни офиса кулгалхо Малсагнаькъан Бекхан, райони а шахьарий а администрацей кулгалхой, иштта кхыбола хьакимаш а.
Гулбеннарашка къамаьл деш Мехкдас белгалдир хIаравар ше тIаэтта гIулакх дизза кхоачашдеш, цIенхашта къахьегаш хила веза, аьнна.
«Вайх хIаравар къаман проекташ кхоачашъяргахьа бола ший бехктокхам кхетабеш хила веза. Моттарах дола гIулакх дIа а даьккха плановий болх хьабе беза массане а. Вайна хьалхашка латташ дола лерхIаме декхар да – вай мехка бахархой хьал тоадар. 100% хьакхоачашъеш хьалдиза деза вай РФ паччахьа майски указаш, масса оагIорахьа кхоачашде деза мишталли гойтамаш», — аьнна белгалдаьккхар Калиматанаькъан Махьмуд-Iаьлас.
Малсагнаькъан Бекхана яхачох проекташ кхоачашъяргахьа эшаш дола ахча дехаш федеральни центраца бувзам лоаттабеш ГIалгIайчено 32 финансови барт язбаьб 5 млрд 478 млн 756,9 эзар сом ахчан. Иштта 39 ахча доаца барт а язбаьб къаман проекташца чубоагIаш. Июль бетта 18 дийнахьа хиннача хоамах 51 контракт оттаяьй мехкарча подрядчикашца лаьрххIа йола къаман проекташ кхоачашъяргахьа эшаш бола болх кхоачашбергболаш. ДIахо Бекхана дийцар 2019 шера РФ паччахьа указ кхоачашдеш 800 социальни гIишло хьалъе лерхI мехка къаман проекташта юкъе чуйоагIаш.
«Демография» яхача мехка проекта чу йихьа ийс гIишло я берий беш хургйолаш хьалъе лаьрхIа. «Здравоохранение» яхача къаман проектах йолаяь шиъ ФАП я ЖIайрахеи, Iарамхеи. «Образование» яхача къаман проектах мехка йиъ школа хьалъе лерхI хIаране чу 720 дешара моттиг йолаш: Назранеи, Илдарха-ГIалий тIеи, Пхьилекъонгий-Юртеи, Юкъерча Ачалкхеи. Иштта 250 дешара моттиг йолаш школа а йоттаргйолаш я Яндаре, 2020 шу чакхдалале болх бе йола а лургйолаш», — аьнна дийцар проектни офиса кулгалхочо.
Кхы дIахо йолча къаман проектех кертте латташ дола дашха дезача хаттарех а дийцар Малсагнаькъан Бекхана, ер шу чакхдалале тIатаIIа болх а беш, тIехьа ца дусаш кхоачам лоаттабергба, аьнна.
Калиматанаькъан Махьмуд-Iаьлас Бекхана тIадиллар, къаман проекташ кхоачашъярах дола гIулакх ГIалгIайчен правительствоца цхьана лерттIа тIахьожам а беш кхоачашде деза аьнна.

Матенаькъан Илез

№ 108 (12243), шинара, 23 июль, 2019 шу / вторник, 23 июля 2019 года

Добавить комментарий

Ваш e-mail не будет опубликован. Обязательные поля помечены *