Дикача гIишлонхочун дукха мах ба

Масса йолча ханашкахьа веза а сий долаш а хиннав гIишлонхо. Дикача гIишлонхочун мах лакха хиннаб дилла а. Ший кулгашца хIама хьаде ховш волча сага атта дуъ вахар. Ишта хиннад из массаза а. Из говзал йоацаш цIаккха а боахабеннабац нах укх дунен тIа, е боахалургба аьлча бакъ а хеталуц.

Хьалха, Дала адам кхеллачахой, шоашта малхах, догIах, лайх, йIовхалах, шелалах, гIаьрахой зуламех, оакхарех лорабалар духьа цхьацца чуIе, лаьттах толаш яха а, тIаккха, бунаш е а, тIехьагIо цIенош де а болабеннаб нах укх дунен тIа шоай баха безандаь. Саг массаза а чуIе моттиг езаш хьавенав укх дунен тIа ваьлчахой, бакъда ма хетта из вIаштIехьадоалаш хиннадац дунен дахарца эггара хьалха болабенначар. Тахан а, шоашта ма хетта цIа де а е ков чудерзаде а вIаштIехьа ца доалаш нах нийслу вайна юкъе, хIана аьлча, цхьатарра латтац зама а, наха юкъера гIулакх а, наьха хьал-таро а. Бакъда, гIишлош хьалйотта ховш волча сага наха болхбий ахча Iалаш а дий, тIаккха шийна боахам булл. Хьал-таро дика деце а шийна болх хьабе ховш хиларагI хьабеча болхлошта дала дезар чу а дусаш, цох эша кхоачам Iалаш а беш цIенош хьалду цу тайпарча сага.
Вай хана тархьархоша, тохкамхоша беча балхах, хьалха дIаяхача кхерий заман дукха, нах баьха хилара белгалонаш; аламбекъаш, бурбоарзаш, хьагIараш, чурташ, селингаш хинна хилара лар гучайоал. Царех цхьаццаяраш тахан а эзараш шераш а даьнна латташ я укх дунен тIа. Цо хьахьокх, эзараш шараш хьалха хинна вай дай гIишлош яра балха говзал лакха йолаш, из дика караерзаяь хинналга. ХIаьта вIалла гаьна ваха а ца везаш вай мехка а латташ я пхи бIаь шу, эзар шу, кхы дуккха шераш хьалха а яь гIалаш, ердаш, овттадаь аламбекъаш. Бакъда, гIишлош йоттара говзал даьша шоай тIехьенга а кхоачийташ ноахалга кхаьчаяле а, вай гIалаш а, иштта уж санна кхычахьа дунен тIа латташ йола тамашийна гIишлош а йоттара говзал тахан а дунен Iилманхошта ма ярра гучаяьланза, тохкаш я.
МоллагIа шахьар, юрт, гIала Iоюллаш хилча тарон кхоачам бале хала а доацаш, дуне мел латта ягIарг а йолаш моллагIа хIама хьалъе аьттув ба наьха тахан. Бакъда цу гIулакха дика говзал йолаш гIишлонхой эша. Укх дунен тIа нах баха хайшачахой гIишлонхочун сий а деш, из веза а лоархIаш, цун мах а луш хьадоагIаш таханарча денга даьннад из гIулакх. Мел дукха хьога таро, ахча дар аьнна пайда бац, из дIаделча лерттIа дукхача шерашка латтаргйолаш гIишло хьалъяра говзал йола нах ца хуле. Цудухьа эшаш ба гIишлонхой, цар болх а из бахьан долаш ба наха эшаши, лоархIаши, сий деши.
Хьалха дIаяхача заман чухь хинна гIишлонхойи вай заман гIишлонхойи цхьатара бац. ТIехьарча хана дукха хIама хувцаденнад дунен тIа, дукха говзал яьржай адамашта юкъе. Вахача моттигашка хьежжа хьалъе езаш хIама хилча, хина кхоачам ба е бац, фо цIена хилар цахилар теркалде дезаш, лаьттан бIал чIоагIа ба е бац ха дезаш хул. ХIара денна хIана ялац ала керда хIамаш хьагучаювл гIишлонхой балха тIа. Цудухьа из шеяр, дикагIа, нийсагIа хургйолча тайпара дIаоттаергйолаш тохкаш, цу тIехьа эша говзал караерзаеш, дешаш хул болхлой. Хийла нийслу, хьалха сага вIалла ца хеза чоалхаш.
Цхьа ха яр, гIишлонхо аьлча, духхьал цIа хьалдогIаш вола саг ва-кх из, аьнна, наха хеталуш. ХIаьта хIанз дикка эргадаьнна хувцаденнад цу деша маIан. ГIишлонхо аьлча, массаболча балха оагIорахьа говзал йола саг дагавох наха. Деррига балхаца дувзаденна мел дола хIама цун хов аьле хеталу. Из да, наха ди тIехьа хIама хьатIаIомадеш хилар. ГIишлонхой-м, тайп-тайпара хул: уж ба хургдолча цIеношта чIоагIалда (проект) хьаераш, кхера, кирпишк, долдаш (блоки) дIайоттараш, саркхал (бетон) йоттараш, тIера гIат дIакъовлараш, тхов бераш, чура балхаш дераш, цIен хьоахам бераш, ий тохараш, ток, газа, хий чудулараш, кор, ниI оттадераш, мухь дIа-хьа кхухьача машенаш тIа болх бераш, иштта кхы а уж йоацаш дукха говзалаш я ГIишлонхочун. Уж мел дола балхаш хьадеча сагах гIишлонхо оал вай. ДIауйла йича харцахьа а дац из.
Нагахьа санна дог а лазаш, бе ма беззара цIенача уйланца, дег чура вай уж гIишлош хьалъеш хилча, цу цIеношка моллагIволча сага ваха догдоагIаргда. Хийла гIишлонхочо ше а оал, хала яле а наха эшаш говзал я шоайяр, аьле. ХIара ший гIулакх дезаш вола гIишлонхо ше хьийгача къина чаккхенга хьежжа гIадводаш хул. ХIана аьлча, ший кулгашца ше цхьаккха хIама доацаш даьсса иллача лаьтта цIа хьал а дегIа, цу чу баха, раьза а болаш нах дIачу бахача, кхы хозагIа а дега товр долашагIа а фу хургда сага. Цудухьа гIишлонхой а хила беза шоай болх дог цIена хьабеш, уж дIаоттабаь да а хила веза царна доагIа напагIа ханнахьа дIалуш а, цар мах ховш а. Дийшача наха а цу тIехьа дукха кхайкамаш ду вайга.
«Дала йоах сийдолча Къуръан чухь: «ХIай има дилла нах, оашош яь чIоагIонаш кхоачашъелаш». Цудухьа Даьлацеи, нахацеи воаш яь чIоагIонаш кхоачашъяр вайна тIехьа декхар да. Иштта ер болх бергба аз аьнна болхлочо яь чIоагIо а ер болх Iа хьабича аз еррал мах дIалургба хьона аьнна дас яь чIоагIо а, — из я кхоачаш ца йича Далла хьалхишка хоаттаме отташъяр. Даьлера салам-моаршал хилда цунна, вай Элчас аьннад: «Болхлочун ший йоал дIалелаш, хьацар докъадалале хьалха». Из дIа цадалар зулам хилар белгал доаккхаш цхьакханахьа а аьннад пайхамара, Даьлера салам-моаршал хилда цунна. «ВIаьхий саг наьха декхар дIа ца луш, тIехьтотвалар зулам да шоана». Цудухьа вай я чIоагIонаш кхоачаш а еш, воашта Даьла раьза хургвола никъ лохаш хила деза вай», – йоах, Магасерча маьждига имама Мержой Адама.
ЛерттIа боаггIача тайпара гIишлонхочо шоай болх хьабеш хилча шахьараш, гIалаш, юрташ хозлу, наха из дIа а вех. Бакъда, ше дер дукха сагота воацаш, талмаста деш хилча наха тийшаболх бу цо. Цудухьа моллагIа дика болх хьабеш вола гIишлонхо шийх доаккхалде йиш йолаш ва, хIана аьлча, цо хьийга къа бахьан долаш сибат а даьле хоза тоа а бале дIаотт мохк.
Цкъамарк вицлора. Россе гIишлонхочун ди дезду хIара шера август бетта шоллагIча кIирандийнахьа. Укх шера из нийсденнадар август бетта 11 дийнахьа.
И.АЙЮБОВ

№ 119 (12254), ера, 15 август, 2019 шу / четверг, 15 августа 2019 года

Добавить комментарий

Ваш e-mail не будет опубликован. Обязательные поля помечены *