Сурхо тIара Яндаре дIабодача новкъа знакаш Iоовттаяьй

Массехк ди хьалха оаха яздаьдар Сурхо тIара Яндаре дIабодача новкъа цхьаккха тайпара хоам беш знакаяш яц аьнна. Боккъолдар аьлча, Сурхо тIара Iоволавенна, Яндаре Iочуотталца е гола тохача а, е никъ бехача а, е оакхари хила тарлуча а нахага лорале аьнна хоам беш цхьаккха тайпара цаI знак ягIацар цига оаха из хьоадаьча хана. Оаха из яздар бахьан дар, тхоашта ховш цига оакхари лоазадеш хатараш хиннадаь. Уж хатараш керда доахаргда вай.

2010 шера Яндаре Iочуоттача метте боккха кур бола хазо сай бийнабар КАМАЗ тIатеха, 2014 шера цу новкъа гола тохача масса лийг дийнадар Лада Приора яха машен тIатеха, 2016 шера КАМАЗ Кран тIатеха хьун хьакха йийнаяр цунца цхьана ши хурск а ювш, Соахка 2018 шера хьакхах кхетачара а ваьнна ахка вахавар цхьаькха, укх шера а налах теха ший машен йохаяьяр цу новкъа цхьаькхане. Уж доацаш кхы а да наха хьадувцаш ишта нийсденна хатараш. Из ца хилча бакъахьа хеташ, цох Iаьдало ший доагIача даькъа де дезар кхоачаш ду далара аьнна, нах а шоаш болхаш-боагIаш лоралу балара цига аьнна хеташ яздаьдар оаха цу новкъа знакаш IойогIа езарачарца дага а дайна.
Цу хана ГIалгIайчен машений наькъа паччахьалкхен урхлен производственни отдела керттера говзанча волча Азенаькъан Ахьмада тхога аьннадар Сурхо тIара Яндаре дIабодача хьу йолча цу новкъа уж знакаш IойогIаргья шоаш аьнна. Цул совгIа хоам баьбар цо, Наьсарен района ГИБДД викалца Оздой Исламаца цхьана вIашагIкхийта хиннаб шоаш цу гIулакха цхьа йист яккхар духьа, аьнна. Кастлуш из хаттар дашха уйла йолаш а ба шоаш аьлар Ахьмада, из хаттар оаха айдар бахьан долаш тхона баркал а аьнна. Хьагучох цар цу хана мехкахошта шоаш денна дош кхоачашдаьд. Хувцамаш да бувцаш болча наькъ тIа хинна хьагуш, из оаха санна наха а зийнад, нах дикагIа лора а лу хьун юкъе гIолла бодача новкъа.
Бакъда укхаза Iоовттаяьча знакашта юкъе яц, машен мел боарам болаш лалла йиш я цу метте, цун массал мелий белгалдаь цаI знак ягIац цу новкъа Cурхо тIа хьачуоттача ягIараш ца йийцача. ХIанз аз яц яхаш ювца знакаш хьуна юкъе йоацараш я. Уж дIаеха наха. Из хаттар оаха оттадир ГIалгIайчен машений наькъа паччахьалкхен урхлен производственни отдела кулгалхочунна Iарчакхнаькъан Ахьмада хьалхашка. Цо яхачох эшаш мел йола знакаш цу новкъа Iоовттаяьй цар:
«Цу гIулакхага хьожаш, бIарг коабаш мехка ГИБДД болхлой ба. Цу новкъа оттайинза яргйоацаш мел йола знакаш я оаха овттаяьраш, царца дага а дайна. ХIана аьлча, царна дика хов малагIа знак мичахьа йоагIа, у ба из белгалдер».
Мехка ГАИ тхога баьча хоамах нах бахача юрташка мара машена массал белгалъеш знакаш увттайиц, хIаьта нах ца бахача моттигашка сахьата 90 км ваха йиш я. Цул совгIа мишта лела веза, малагIча боарамах хила веза ховш да праваш мел йолчарна, аьнна а дийцар тхога ГАИ болхлочо.
Ер хаттар оаха айдаьча хана укх новкъа знакаш йоацаш хиларал совгIа никъ беха доахкаш во кIоагаш дар. Уж моттигаш хьа а оахкаш, цига мел дола кIоагаш а дIадикъад, цхьатарра лотораш а даь. ХIанз хьалха санна машенаш Iочуеттаяла кIоагаш дац цу новкъа. Цудухьа машенаш лелаечарга аргдар аз, никъ шаьра ма бий аьнна масса ца а лелаш, хьуна юкъе дехьа-сехьа дувлаш дола оакхарий лораде, вай Iалам да из.
Ер статья оаха язъяьй, шоашка дац аьнна оаха дIабелгалдаь хIама ГАИ а, къаьстта ГIалгIайчен машений наькъа паччахьалкхен урхлено а сомал яь тIаийца кхоачаш дирагI. Нагахьа санна акхар санна вай мехкарча масса урхленаша шоай де дезар кхоачашдеш ишта болх хьабой, вай мехка гIулакх дикача хьал тIехьа тоа а денна дIаоттаргда.

Матенаькъан Илез

№ 119 (12254), ера, 15 август, 2019 шу / четверг, 15 августа 2019 года

Добавить комментарий

Ваш e-mail не будет опубликован. Обязательные поля помечены *