Иштта хул юрта вахача

Iуйранна балха ваха араваьнна, тхоаш дахачара новкъа со Iоводаш, тхона гаьна воацаш вахача лоалахочун наIарга, гаьн кIала техача гIандаш тIа Iохайша багIаш боккхалгахьа ласта нах байра сона. ГIаш вар со, се царна IотIа ма кхаьччанге лаьгI а венна, аз ди дика дийцача боккхий нах шоаш багIачара хьалъайбелар:

— Дукха вахалва хьо, Илез. Фуд цу лакхе, могаш доахкий шо, боккхийча нахага фу хьал да? сенна ваьннав хьо ара? ГIаш хIана ва хьо?
Массехк хаттар дар сога баьгIачарна юкъе воккхагIа цар тхьамада а волча сага. Царга юха йист а хулаш, сайга хаьттача хIаманна духьал жоп а луш аз яьккхача хана чухьа вокха шинне, «дика да, дукха вахалва хьо» мара кхы дош алацар. ГIалгIай эздел, гIулакх, сий да из. Цхьанне къамаьл деча хана вокхарна сабаре хила а, юкъе ца лелха а, шоай тхьамадан сий де хар а да из иштта юртара вахар довзача а леладеча а.
— Балха ваха ваьнна хургва хьо? – дIахо а хаттараш деш вар лоалахо. – Фуд вайна, хьо лелача гIолла, керда? Фу хет хьона мехка доаллача гIулакхах? – дукха дар воккхача сага хаттараш.
Сол дикагIа шийна из деррига гIулакх довзе а, соцара къамаьл хьаллаца, сона шоашца сагота ца хетийта дувцар воккхача сага из къамаьл. ДIахо цхьацца дувцаш, хьалха шоаш леладаьраш а дийца юххера аьлар тхьамадал деш хиннача къоаночо:
— Дукха вахалва хьо. Жи, тIехьа ма висалахь. Тхоца латте-м говргва хьо. Саг балха а волаш, наха накъа а воалаш, мехка гIулакх а ховш, шийна хIама хьа а деш хьаьнала ваха веза. Хала дар аьнна юхавала мегаргвац, Даьла раьза хургвола напагIа хьатIадоагIе шийна Iалашо ца еш. Дезал кхаба беза, нахаца гIулакх леладе деза, гаргалол лелае еза, массагIа да гIулакхаш. Цу гIулакхаша хьалоаттадаьд вай къам массаза а. Дикача наькъ тIа хилва хьо.
Хьалха вай зIамагIа долча хана дукхагIа го йиш яр ишта багIаш боккхий нах. Цар хьаькъал а, хьехам а лора моллагIчоа. Вай хана кIезига да цу тайпара Iадат, фуннагIа даь а юкъера дIадалийта йиш йоаца гIулакхаш да уж. Аз шоашта доккха хIама дича санна, лоам Iобеча мо товр хинна, гIадбаха бар уж, лоацача юкъа аз шоашка ладувгIарах а цхьацца керда хабараш дувцарах а. Дукха эшац воккхача сага дог хьаста а нахаца безаме ваха а.

МАТЕНАЬКЪАН Илез

№ 124 (12259), шоатта, 24 август, 2019 шу / суббота, 24 августа 2019 года

Добавить комментарий

Ваш e-mail не будет опубликован. Обязательные поля помечены *