ГIалгIайчен Халкъа гуллама шовзткъеи вурийтталагIча ховшарга дакъалаьцар Калиматнаькъан Махьмуд-Iаьлас

ГIалгIайчен паччахьалкхен декхар, экономика керттерча халонех цаI хила тарлуш да. Цу хьаькъе дийцар Мехкдаь декхараш кхоачашдеш волча Калиматнаькъан Махьмуд-Iаьлас Халкъа гуллама гуйранарча йийлача сессе.

«Цифрашцеи, экономика расчеташцеи шоана мухь тIабила, шо унзардаха догдагIац са, аз духхьал аргда, лаьгIа боаца болх цу оагIорахьа бе безалга. Нагахьа из ца дой, йоккха халонаш хургья эггара ца эшача моттигашка. Из да дешар, унахцIено, социальни выплаташ», — аьнна белгалдир, Макшарипа Махьмуд-Iаьлас.
Мехкдаь декхараш кхоачашдечо яхачох, хьалха дIаяхача ханашкахьа хинна халонаш тахан а йолаш я мехка. Уж юстараяха къахьега дезаргда.
«Российски Федерацен паччахьа Путин Владимира сона ГIалгIайчен Мехкдаь декхараш хьатIадахкар, сона дагадоаццаш хилар. Аз дукхача ханашкахьа болх баьб мехкал арахьа, иштта вай мехка прокурор волаш а баьб аз болх. Мехка социальни, экономически, политически вахара дукха халонаш сона хIанз а йовзаш, хувцаяланза я», — аьнна дийцар Мехкдас.
Махьмуд-Iаьлас белгалдир мехка хьал тоадеча, наьха вахаре дакъа лоацаш, дар-доацар фуд ховш хила еза мехка парламент, аьнна.
«Мехка экономика вахар чу Iочуваьлча, аз дукхагIа кхетаду социально-экономически блока доалдеш доа, долаш дола Россеюкъара законаши Правительства акташи даьд алийта кхоачашдеш хилари, цкъаза уж юхадетташ хилари. Хьагучох цу тайпара хьал да инвестиционни политике а. Аз дехар дергдар парламентагеи, Iаьдала исполнительни органашкеи къаман программаши инвестиционни проекташи кхоачашъеча хьинаре дакъалаца аьнна. Юххера а, дийцача мехка бюджет ма дий из. Башхало яц федеральни да из е региональни да. Керттерадар да доагIача мехка халкъа гIулакха из дIадахийтар. Мехка бахархой социально-экономически вахара хьале дакъа лаца деза Парламенто, къаьстта целевой бюджет ший доагIача дIадахийтара терко а еш», — аьнна тIатехар Мехкдас.
Ший къамаьл чакхдоаллаш Мехкдас белгалдир массанена а дикагIдар – белгалдаьха кхоачамбоацараш юстарадахар да, аьнна. Цу гIулакха вIаший бувзам лелабари, тоабаь болхи эша. ГIалгIайчен Халкъа гуллам тIахьийхар цо, исполнительни Iаьдала гIодара, эшаш хуле долаш дола гIалат шийг хьаала аьнна.
«Со массаза а кийча ва эшаш долча къамаьла дакъа лаца. Дерригаш цхьана айтта ма могга низ дIатIабахийта беза вай, воай мохк дегIабаргахьеи, мехка бахархой вахара хьал тоадаргахьеи», — аьнна чакхдаьккхар Калиматнаькъан Мухьмад-Iаьлас ший къамаьл.

И. Айюбов

№ 127-128 (12262-263), шоатта 31 август, 2019 шу / суббота, 31 августа 2019 года

Добавить комментарий

Ваш e-mail не будет опубликован. Обязательные поля помечены *