Йоазонхо дагалаьца

Вай республике шерра дездеш да гIалгIай халкъа йоазонхочун Плиев Махьмад-СаIида 90 шу дизар. Цунна хетаяь выставка яьй Наьсарерча мохк тохкаш йолча музее, телепередачаш хиннай, газеташ тIа дагалоацама йоазош даьд, цхьацца сайренаш чакхъяьхай школашка. ТIеххьарчарца айхха бувзам болаш, каст-каста вай республикерча школашка деша дагIа бераш долча водаш а вар из, дийна волча хана. Царга ала а еша а хIама яр Махьмад-СаIида. Берашта лаьрхIа цо язъяьяр 6 классе Iомаеш йола «Этии Вутии» яха повесть, 9 классе Iомадеш дола  «ВIашагIкхетар», «Матрос» яха дувцараш, зIамагIдолча берашта лаьрхIа «Митар-Петар» яха байташца язбаь фаьлг, кхыдола йоазош дар цун.

 

Ше валале цхьа-ши шу хьалха, хилар из Сурхо тIарча ООШ оалача ийс шера дешача школе. Берашта хьехам луш дукха къамаьл дир цо. Къаьстта цо белгалдоахар дика деша дезилга, дийша воацача сага хала ваха везилга. Цу вIашагIкхетаре ший «ГIалгIа ва со» яхача кердача книжка тIара стихотворенеш йийшар поэта, царех яр «Ши Мадина» яхар. Иштта цо йийшар Муталиев Хьажбикара гIалгIай меттала яьккха эрсий поэта Пушкин Александра «Iан сайре» яха байт а. Автографаш увттайир сурташ тIа а книжкаш тIа а. Цул совгIа, Плиев чуваха хилар школерча музее, цунна хоза хийтар укхаза вIашагIтеха вай къаман  художникий сурташ, моттигерча йоазонхой книжкаш, театральни тумба, цу тIара афишаш. Школан хьехархошца сурт а даьккхар цо музее. Из сурт хIанзалца цхьаннахьа кепа теха хиннадац. Газет дешарашта хоза хетаргда аьнна хет сона хьехархошца цо даьккха сурт.

 

С. Арчаков

 

 

Добавить комментарий

Ваш e-mail не будет опубликован. Обязательные поля помечены *